وزیرِاعظم شہباز شریف کا بیلاروس کے جنگ عظیم دوم کے شہداء کو خراجِ عقیدت
منسک، یورپ ٹوڈے: وزیرِاعظم محمد شہباز شریف نے بیلاروس کے دارالحکومت منسک میں واقع وکٹری مونومنٹ (یادگارِ فتح) پر پھولوں کی چادر چڑھائی اور جنگ عظیم دوم کے دوران جانوں کا نذرانہ پیش کرنے والے بیلاروسی عوام کو پُرعقیدت خراجِ تحسین پیش کیا۔
وکٹری اسکوائر آمد پر وزیرِاعظم اور ان کے ہمراہ اعلیٰ سطحی وفد کو مکمل سرکاری اعزازات کے ساتھ خوش آمدید کہا گیا۔ بیلاروس کی مسلح افواج کے چاق و چوبند دستے نے سلامی پیش کی جبکہ پاکستان اور بیلاروس کے قومی ترانے بجائے گئے۔
وزیرِاعظم شہباز شریف کے ہمراہ نائب وزیرِاعظم و وزیرِ خارجہ سینیٹر محمد اسحاق ڈار، وزیرِ اطلاعات و نشریات عطا اللہ تارڑ اور وزیرِاعظم کے معاونِ خصوصی سید طارق فاطمی بھی موجود تھے۔
تقریب میں بیلاروس کے وزیرِاعظم الیگزینڈر تورچن بھی شریک ہوئے، جنہوں نے اس سے قبل ایئرپورٹ پر وزیرِاعظم شہباز شریف کا پرتپاک استقبال کیا۔
وکٹری مونومنٹ پر خراجِ عقیدت پیش کرنے کی تقریب پاکستان اور بیلاروس کے درمیان باہمی احترام، یکجہتی اور ان قربانیوں کی مشترکہ قدردانی کی علامت تھی جو امن و آزادی کے لیے دی گئیں۔
