راولپنڈی ٹیسٹ: پاکستان کی پہلی اننگز 274 رنز پر سمٹ گئی
راولپنڈی، یورپ ٹوڈے: پاکستان کرکٹ ٹیم دوسری ٹیسٹ میچ کی پہلی اننگز میں 274 رنز بنا کر آل آؤٹ ہو گئی۔ راولپنڈی میں جاری ٹیسٹ میچ کے دوران مہمان ٹیم بنگلا دیش نے ٹاس جیت کر فیلڈنگ کا فیصلہ کیا۔
بارش کی وجہ سے پہلا دن ضائع ہو گیا، تاہم دوسرے دن پاکستان نے بیٹنگ کا آغاز کیا، جہاں ٹیم کو ابتدائی نقصان صفر پر ہی اٹھانا پڑا جب تسکین احمد نے عبداللّٰہ شفیق کو آؤٹ کیا۔
کپتان شان مسعود اور صائم ایوب نے دوسری وکٹ کے لیے 107 رنز کی شراکت داری کی، تاہم شان مسعود 57 رنز بنا کر مہدی حسن کی گیند پر ایل بی ڈبلیو ہوگئے۔ صائم ایوب 58 رنز کی اننگز کھیل کر 123 کے مجموعے پر اسٹمپ ہو گئے، انہیں بھی مہدی حسن نے آؤٹ کیا۔
پاکستان کی چوتھی اور پانچویں وکٹ بالترتیب 151 اور 179 رنز پر گریں، جس میں سعود شکیل 16 اور بابر اعظم 31 رنز بنا کر آؤٹ ہوئے۔ گزشتہ میچ میں سنچری بنانے والے محمد رضوان اس اننگز میں 29 رنز بنا سکے اور ناہید رانا کی گیند پر کیچ آؤٹ ہوئے۔
سلمان علی آغا نے عمدہ بیٹنگ کا مظاہرہ کرتے ہوئے 54 رنز بنائے، جس سے پاکستان کا مجموعی اسکور 274 رنز تک پہنچا۔ دیگر کھلاڑیوں میں خرم شہزاد نے 12، محمد علی نے 2 اور ابرار احمد نے 9 رنز بنائے۔
بنگلا دیش کی جانب سے مہدی حسن میراج نے 5 وکٹیں حاصل کیں، جبکہ تسکین احمد نے 3 اور شکیب الحسن اور ناہید رانا نے ایک ایک کھلاڑی کو آؤٹ کیا۔
دوسرے ٹیسٹ میچ کا پہلا دن بارش کے باعث ضائع ہو گیا تھا، جس کے بعد میچ کا دوسرا دن مکمل ہوا۔
