وزیرِ اعظم محمد شہباز شریف کی رہبرِ معظم سید علی خامنہ ای سے ملاقات، دوطرفہ اور علاقائی امور پر تبادلہ خیال

تہران، یورپ ٹوڈے: وزیرِ اعظم پاکستان محمد شہباز شریف نے ایران کے رہبرِ معظم حضرت آیت اللہ سید علی خامنہ ای سے تہران میں شرفِ ملاقات حاصل کیا، جہاں دونوں رہنماؤں کے درمیان دوطرفہ تعلقات اور علاقائی امور پر تبادلہ خیال کیا گیا۔

وزیرِ اعظم کے ہمراہ چیف آف آرمی اسٹاف جنرل سید عاصم منیر، نائب وزیرِ اعظم و وزیرِ خارجہ سینیٹر محمد اسحاق ڈار، وفاقی وزیرِ داخلہ سید محسن رضا نقوی اور وفاقی وزیرِ اطلاعات عطا اللہ تارڑ بھی موجود تھے۔

وزیرِ اعظم شہباز شریف نے رہبرِ معظم کو پاکستانی عوام اور حکومت کی جانب سے دلی احترام پیش کیا اور کہا کہ آپ عالمِ اسلام کی ایک عظیم المرتبت شخصیت ہیں، جنہیں پوری اُمتِ مسلمہ رہنمائی اور سرپرستی کا مرکز سمجھتی ہے۔

ملاقات کے دوران وزیرِ اعظم نے بھارت کے ساتھ حالیہ کشیدگی، بھارت کے توسیع پسندانہ عزائم اور جارحانہ پالیسیوں پر تفصیلی بریفنگ دی، اور ایرانی قیادت کی جانب سے پاکستان کے مؤقف کی حمایت پر گہرے شکریے کا اظہار کیا۔ انہوں نے اس عزم کا اعادہ کیا کہ پاکستان خطے میں امن و ترقی کا خواہاں ہے تاکہ علاقائی خوشحالی کو یقینی بنایا جا سکے۔

وزیرِ اعظم نے ایران کے ساتھ دوطرفہ تعلقات کو اعلیٰ ترین سطح پر لے جانے کے لیے کیے گئے اقدامات سے آگاہ کیا اور کہا کہ ان کی حکومت موجودہ پیچیدہ جغرافیائی و سیاسی حالات میں ایران کے ساتھ اسٹریٹجک تعاون کو مزید مضبوط بنانے کے لیے پرعزم ہے۔

انہوں نے ایرانی قیادت کی دور اندیشی کو سراہتے ہوئے امریکا کے ساتھ جوہری مذاکرات میں مثبت پیشرفت کی امید ظاہر کی تاکہ خطے میں امن و استحکام کو فروغ مل سکے۔

رہبرِ معظم آیت اللہ سید علی خامنہ ای نے وزیرِ اعظم شہباز شریف کی خطے میں امن و استحکام کے فروغ کے لیے کوششوں کو سراہا اور پاکستان و ایران کے تعلقات کو مزید مضبوط بنانے کے حوالے سے ان کی ذاتی وابستگی کی تعریف کی۔ انہوں نے پاکستان اور اس کے عوام کی ترقی، خوشحالی اور استحکام کے لیے دعا بھی کی۔

وزیرِ اعظم نے رہبرِ معظم کی علامہ اقبالؒ، شاعرِ مشرق، سے محبت اور ان کے کلام سے وابستگی کو خراجِ تحسین پیش کیا اور ان سے درخواست کی کہ وہ جلد از جلد پاکستان کا دورہ فرمائیں۔