وزیراعظم شہباز شریف کا کوئٹہ میں کمانڈ اینڈ اسٹاف کالج کا دورہ، آپریشن “بنیان مرصوص” میں پاک افواج کی شاندار کارکردگی کو خراج تحسین

کوئٹہ، یورپ ٹوڈے: وزیراعظم محمد شہباز شریف نے ہفتہ کے روز کمانڈ اینڈ اسٹاف کالج کوئٹہ کے دورے کے دوران آپریشن “بنیان مرصوص” میں پاک افواج کی شاندار کارکردگی کو سراہتے ہوئے اُن کی جرات، پیشہ ورانہ مہارت اور قربانیوں کو زبردست خراجِ تحسین پیش کیا۔

وزیراعظم نے فیکلٹی اور فارغ التحصیل افسران سے خطاب کرتے ہوئے کہا کہ مسلح افواج نے جس مثالی جذبے اور پیشہ ورانہ طریقے سے قوم کا دفاع کیا ہے، وہ ملک کے اعلیٰ ترین اعزازات کا مستحق ہے۔

انہوں نے کہا کہ پاک افواج ملک کی خودمختاری، جغرافیائی سالمیت اور داخلی سلامتی کے تحفظ میں کلیدی کردار ادا کر رہی ہیں، اور حکومت اس مشن میں افواجِ پاکستان کی مکمل معاونت جاری رکھے گی۔

وزیراعظم نے کہا کہ درپیش چیلنجز سے نمٹنے اور قومی مفادات کے حصول کے لیے قومی طاقت کے تمام عناصر کے مابین ہم آہنگی کا تسلسل ناگزیر ہے۔

خطاب کے دوران انہوں نے بھارت کو شدید تنقید کا نشانہ بناتے ہوئے کہا کہ “معرکۂ حق” میں ذلت آمیز شکست کے بعد بھارت نے پاکستان کے اندر اپنے آلہ کاروں کے ذریعے دہشت گردی کی مہم تیز کر دی ہے۔

انہوں نے کہا کہ بھارت اور اس کے فتنہ پرور آلہ کار “فتنہ الہندستان” کے تمام مذموم عزائم کو پاکستانی قوم ناکام بنائے گی، ان شاء اللہ۔

وزیراعظم کے کمانڈ اینڈ اسٹاف کالج پہنچنے پر چیف آف آرمی اسٹاف فیلڈ مارشل سید عاصم منیر، نشانِ امتیاز (ملٹری) نے ان کا استقبال کیا۔