پاکستان اور میانمار 50 سال بعد مدمقابل، اے ایف سی ایشین کپ کوالیفائر کا اہم میچ کل رنگون میں ہوگا
رنگون، یورپ ٹوڈے: اے ایف سی ایشین کپ کوالیفائر کے تیسرے راؤنڈ میں پاکستان فٹبال ٹیم اپنا دوسرا میچ کل (منگل) کو میانمار کے خلاف کھیلے گی۔ میچ کے لیے قومی ٹیم میانمار پہنچ چکی ہے، جہاں یہ مقابلہ رنگون کے تھوونا فٹبال اسٹیڈیم میں پاکستانی وقت کے مطابق دوپہر 3:30 بجے شروع ہوگا۔
یہ میچ تاریخی حیثیت رکھتا ہے کیونکہ 1974 کے بعد دونوں ٹیمیں پہلی بار آمنے سامنے آ رہی ہیں۔ اُس وقت میانمار کو برما کے نام سے جانا جاتا تھا اور اس میچ میں برما نے پاکستان کو 1-5 سے شکست دی تھی۔
عالمی درجہ بندی میں پاکستان کو برتری حاصل نہیں
فیفا رینکنگ کے مطابق اس وقت پاکستان 198ویں جبکہ میانمار 162ویں نمبر پر موجود ہے۔ دونوں ممالک کے درمیان اب تک کھیلے گئے 8 میچز میں دونوں نے 3-3 کامیابیاں حاصل کی ہیں، جبکہ 2 میچز برابری پر ختم ہوئے۔
حالیہ کارکردگی کا جائزہ
- میانمار نے کوالیفائر کے پہلے میچ میں افغانستان کو شکست دی تھی
- پاکستان کو اپنے پہلے میچ میں شام کے ہاتھوں شکست کا سامنا کرنا پڑا
- پاکستان نے آخری 7 بین الاقوامی میچز میں شکست کھائی ہے
- میانمار نے آخری 7 میچز میں 2 فتوحات حاصل کی ہیں جبکہ 1 میچ ڈرا ہوا
ہیڈ کوچ کی امیدیں وابستہ
پاکستان کے ہیڈ کوچ اسٹیفین کونسٹنٹائن نے کہا ہے کہ وہ میانمار کے خلاف اچھے نتائج کے لیے پُرامید ہیں۔ ان کا کہنا تھا کہ ٹیم میں نوجوان اور باصلاحیت کھلاڑی شامل ہیں اور وہ ٹیم کی پچھلی شکستوں کا ازالہ کرنے کے لیے پُرعزم ہیں۔
قومی ٹیم نے میانمار کے خلاف 1962 میں آخری کامیابی حاصل کی تھی، اور اب تقریباً چھ دہائیوں بعد یہ میچ پاکستان کے لیے نہ صرف کوالیفائنگ مرحلے بلکہ قومی فٹبال کی بحالی کے لیے بھی اہم سنگِ میل ہو سکتا ہے۔
