آرمی چیف کی زیر صدارت کور کمانڈرز کانفرنس: احتسابی نظام پر سختی سے عملدرآمد کا عزم
راولپنڈی، یورپ ٹوڈے: آرمی چیف جنرل سید عاصم منیر کی زیر صدارت کور کمانڈرز کانفرنس نے فوج میں موجود کڑے احتسابی نظام پر مکمل عملدرآمد کو ادارے کے استحکام کے لیے لازمی قرار دیا۔ کانفرنس میں عزم کیا گیا کہ احتساب میں کسی قسم کی جانبداری یا استثنیٰ کی گنجائش نہیں ہوگی اور کوئی بھی فرد احتساب کے عمل سے بالاتر نہیں ہو سکتا۔
پاک فوج کے شعبہ تعلقات عامہ (آئی ایس پی آر) کے مطابق کانفرنس میں شہداء کے ایصال ثواب کے لیے فاتحہ خوانی کی گئی اور پاکستان کے امن و استحکام کے لیے قربانیاں دینے والے شہداء، قانون نافذ کرنے والے اداروں اور بلوچستان و خیبر پختونخوا کے شہریوں کو خراج عقیدت پیش کیا گیا۔
کانفرنس کے دوران شرکاء کو خطے کی صورتحال، قومی سلامتی کو درپیش چیلنجز اور بڑھتے خطرات کے جواب میں آپریشنل حکمت عملی پر بریفنگ دی گئی۔ فورم نے ملک دشمن قوتوں اور ان کے پاکستان مخالف اندرونی و بیرونی سہولت کاروں کے تدارک کے لیے اقدامات کا بھی جائزہ لیا۔
آرمی چیف جنرل سید عاصم منیر نے کانفرنس کے دوران ایک مضبوط اور مؤثر قانونی نظام کی اہمیت پر زور دیا اور فوج کے ہر فرد کی پیشہ ورانہ مہارت اور ریاست کے ساتھ وفاداری کو برقرار رکھنے کی ضرورت پر زور دیا۔ کانفرنس نے عوام کی غیرمتزلزل حمایت کے ساتھ انسداد دہشت گردی کی کوششوں کو مزید مضبوط کرنے کے عزم کا اظہار کیا۔
