پاکستان-متحدہ عرب امارات مشترکہ وزارتی کمیشن کے 12ویں اجلاس میں دو طرفہ تعاون کے فروغ پر اتفاق

اسلام آباد، یورپ ٹوڈے: پاکستان اور متحدہ عرب امارات کے درمیان مشترکہ وزارتی کمیشن (JMC) کے بارہویں اجلاس میں دوطرفہ تعلقات کے تمام پہلوؤں کا جائزہ لیا گیا اور تجارت، بینکاری، سرمایہ کاری سمیت دیگر شعبوں میں باہمی تعاون کو مزید مستحکم بنانے کے لیے ٹھوس اقدامات پر اتفاق کیا گیا۔

یہ اجلاس منگل کے روز ابوظہبی میں منعقد ہوا، جس کی مشترکہ صدارت پاکستان کے نائب وزیراعظم اور وزیر خارجہ سینیٹر محمد اسحاق ڈار اور متحدہ عرب امارات کے نائب وزیراعظم و وزیر خارجہ شیخ عبداللہ بن زاید آل نہیان نے کی۔

اجلاس کے دوران دونوں ممالک کے وزراء نے دوطرفہ تعلقات کو مزید وسعت دینے کے لیے قریبی رابطوں اور عملی تعاون کی اہمیت پر زور دیا۔ شرکاء نے اس بات پر بھی زور دیا کہ اقتصادی، تجارتی اور مالیاتی شراکت داری کو نئی بلندیوں تک پہنچانے کے لیے مشترکہ کوششوں کی ضرورت ہے۔

اجلاس میں مختلف معاہدوں اور یادداشتوں کے مسودات پر بھی غور کیا گیا جو دونوں ممالک کے درمیان قریبی شراکت داری کو مزید مؤثر بنانے میں معاون ثابت ہوں گے۔