فرانس بھر میں یومِ آزادی (باسٹیل ڈے) بھرپور قومی جوش و خروش سے منایا گیا
پیرس، یورپ ٹوڈے: فرانس میں سب سے بڑا قومی تہوار، یومِ آزادی یا “باسٹیل ڈے”، ہر سال 14 جولائی کو 1789 میں باسٹیل قلعے پر عوامی حملے کی یاد میں منایا جاتا ہے، جو فرانسیسی انقلاب کا نقطۂ آغاز ثابت ہوا۔
فرانسیسی میڈیا رپورٹس کے مطابق، اس سال بھی ملک بھر میں یومِ آزادی جوش و خروش سے منایا گیا، جس میں ایفل ٹاور کے اوپر ڈرون لائٹ شو، آتش بازی اور عسکری فضائی پریڈ شامل تھیں۔ تقریباً 7,000 افراد نے فوجی وردیوں میں، گھوڑوں پر سوار یا بکتر بند گاڑیوں میں سوار ہو کر پیرس کی مشہور شانزے لیزے (Champs-Élysées) شاہراہ پر مارچ کیا۔
ملک بھر میں اس تاریخی دن کی مناسبت سے متعدد تقاریب کا انعقاد کیا گیا، جس میں فرانسیسی عوام نے بڑی تعداد میں شرکت کی۔
یہ دن اس تاریخی واقعے کی یاد دلاتا ہے جب 14 جولائی 1789 کو پیرس کے عوام نے باسٹیل قلعے اور قیدخانے پر دھاوا بولا، جو شاہی ظلم و جبر کے خلاف بغاوت کی علامت بن گیا اور فرانسیسی انقلاب کا آغاز ہوا، جس کے نتیجے میں بالآخر بادشاہت کا خاتمہ ہوا۔
گزشتہ دو صدیوں میں فرانس نے نپولین کی سلطنت کا عروج و زوال، مختلف انقلابات، دو عالمی جنگیں اور سیاسی تبدیلیوں کا سامنا کیا، جس کے بعد 1958 میں موجودہ “پانچویں جمہوریہ” کی بنیاد رکھی گئی، جو آج تک قائم ہے۔
