انڈونیشیا کے وزیر دفاع کی جی ایچ کیو آمد، فیلڈ مارشل عاصم منیر سے ملاقات
راولپنڈی، یورپ ٹوڈے: انڈونیشیا کے وزیر دفاع نے اپنے اعلیٰ سطحی وفد کے ہمراہ منگل کے روز جنرل ہیڈکوارٹرز (جی ایچ کیو) کا دورہ کیا اور چیف آف آرمی اسٹاف فیلڈ مارشل عاصم منیر سے ملاقات کی۔
پاک فوج کے شعبۂ تعلقات عامہ (آئی ایس پی آر) کے مطابق انڈونیشی وفد میں مختلف سروسز اور انٹیلی جنس ایجنسیوں کے نمائندگان شامل تھے۔ ملاقات کے دوران دونوں ممالک کے درمیان دوطرفہ دفاعی تعاون، علاقائی سلامتی کی صورتحال اور عسکری روابط کو مزید مستحکم بنانے کے امکانات پر تبادلہ خیال کیا گیا۔
آئی ایس پی آر کے بیان میں کہا گیا ہے کہ اس موقع پر پاکستان اور انڈونیشیا کے مابین دیرینہ دوستی اور تعاون پر زور دیا گیا، جبکہ فیلڈ مارشل عاصم منیر نے خطے میں امن و استحکام کے لیے باہمی تعاون کی اہمیت پر روشنی ڈالی۔
انڈونیشیا کے وزیر دفاع نے دہشت گردی کے خلاف جنگ میں پاک فوج کے کردار کو سراہا اور پاکستان کے ساتھ دفاعی تعلقات کو مزید فروغ دینے کے عزم کا اعادہ کیا۔
