راہول گاندھی کا مودی سے مطالبہ: ٹرمپ کے 5 بھارتی طیارے گرائے جانے کے بیان پر قوم کو سچ بتایا جائے
نئی دہلی، یورپ ٹوڈے: بھارتی اپوزیشن رہنما اور کانگریس کے سینئر لیڈر راہول گاندھی نے وزیر اعظم نریندر مودی سے مطالبہ کیا ہے کہ وہ حالیہ پاک-بھارت کشیدگی کے دوران پانچ بھارتی طیارے مار گرائے جانے سے متعلق امریکی صدر ڈونلڈ ٹرمپ کے بیان پر قوم کو سچائی سے آگاہ کریں۔
عالمی خبر رساں ادارے کے مطابق صدر ٹرمپ نے وائٹ ہاؤس میں میڈیا سے گفتگو کرتے ہوئے انکشاف کیا تھا کہ پاک بھارت جنگ کے دوران پانچ جنگی طیارے تباہ ہوئے تھے۔ ٹرمپ کے اس بیان کے بعد بھارتی سیاسی حلقوں میں شدید بے چینی پیدا ہوگئی ہے۔
راہول گاندھی نے سوشل میڈیا پر جاری پیغام میں کہا:
“مودی جی، ان پانچ طیاروں کا اصل سچ کیا ہے؟ قوم کو جاننے کا پورا حق ہے۔”
انہوں نے صدر ٹرمپ کے بیان کی ویڈیو بھی شیئر کی اور وزیر اعظم مودی کی خاموشی پر تنقید کی۔
کانگریس کی ترجمان کی جانب سے بھی حکومتی مؤقف پر سوالات اٹھائے گئے اور ان پرانے بیانات کی نشاندہی کی گئی جن میں بھارتی حکام خود طیارے گرنے کا اعتراف کر چکے ہیں۔ ان میں چیف آف ڈیفنس اسٹاف جنرل انیل چوہان کا وہ بیان بھی شامل ہے جس میں انہوں نے کہا تھا:
“اصل سوال یہ نہیں کہ جہاز گرے یا نہیں، بلکہ یہ ہے کہ وہ کیسے گرے۔”
یاد رہے کہ 7 مئی کو پیلگام حملے کی آڑ میں بھارت نے پاکستان پر فضائی حملے کیے تھے، جس کے جواب میں پاکستان نے مؤثر دفاعی حکمت عملی اختیار کرتے ہوئے بھارت کے جدید رافیل طیاروں سمیت پانچ طیارے مار گرائے تھے۔
صدر ٹرمپ کے انکشاف سے پاکستانی موقف کی تصدیق ہوئی ہے جبکہ بھارتی حکومت کے لیے یہ ایک سخت سیاسی امتحان بنتا جا رہا ہے۔
