آرمی چیف فیلڈ مارشل سید عاصم منیر کا دہشت گردی کے خاتمے اور بلوچستان کی سماجی و اقتصادی ترقی کے عزم کا اعادہ

راولپنڈی — چیف آف آرمی اسٹاف (سی او اے ایس) فیلڈ مارشل سید عاصم منیر، نشانِ امتیاز (ملٹری) نے بدھ کے روز کہا ہے کہ پاکستان آرمی دہشت گردی کے ناسور کے مکمل خاتمے کے لیے پرعزم ہے اور قومی یکجہتی و استحکام کے لیے بلوچستان کی سماجی و اقتصادی ترقی ناگزیر ہے۔

ان خیالات کا اظہار انہوں نے نیشنل ڈیفنس یونیورسٹی میں منعقدہ 16ویں نیشنل ورکشاپ بلوچستان کے شرکاء سے گفتگو کرتے ہوئے کیا، جس میں مختلف مکاتب فکر سے تعلق رکھنے والے افراد بشمول پارلیمنٹرینز، سول سوسائٹی کے نمائندگان، سول سرونٹس، ماہرین تعلیم، میڈیا کے افراد اور نوجوان شریک تھے۔

آئی ایس پی آر کی جانب سے جاری کردہ پریس ریلیز کے مطابق، فیلڈ مارشل عاصم منیر نے بھارت کی جانب سے دہشت گرد نیٹ ورکس کی کھلی سرپرستی کی شدید مذمت کرتے ہوئے اسے بلوچستان کے عوام کے گہرے وطن پرستانہ جذبات کو نشانہ بنانے کی ایک ناکام کوشش قرار دیا۔ انہوں نے واضح کیا کہ بھارت، جو پہلے معرکۂ حق میں شکست کھا چکا ہے، اب فتنۂ خوارج اور فتنۂ ہندوستان جیسے عناصر کو بطور ہائبرڈ وار آلہ استعمال کر رہا ہے تاکہ پاکستان کے خلاف سازشوں کو فروغ دیا جا سکے۔

آرمی چیف نے کہا کہ یہ دہشت گرد پراکسیز بھی ان شاء اللہ معرکۂ حق کی طرح ذلت آمیز انجام سے دوچار ہوں گی۔ انہوں نے اس بات پر زور دیا کہ دہشت گردی کسی مذہب، فرقے یا نسل کی قید سے آزاد ایک عالمی لعنت ہے، جس کے خلاف قومی سطح پر متحدہ ردعمل کی ضرورت ہے۔

انہوں نے بلوچستان میں ترقیاتی اقدامات کی اہمیت کو اجاگر کرتے ہوئے مختلف اداروں کے مابین قریبی تعاون اور مربوط قومی حکمتِ عملی کو صوبے کی ترقی اور ملکی استحکام کے لیے ناگزیر قرار دیا۔

فیلڈ مارشل عاصم منیر نے علاقائی امن کے لیے پاکستان کے عزم کا اعادہ کرتے ہوئے کہا کہ ملک ہر قسم کے داخلی و خارجی خطرات سے نمٹنے کے لیے مکمل تیار ہے اور قومی وقار کے تحفظ اور عوام کی سلامتی کو ہر صورت یقینی بنایا جائے گا۔

اجلاس کا اختتام آرمی چیف اور شرکاء کے درمیان ایک بے تکلف مکالمے پر ہوا، جس میں قومی معاملات پر کھل کر گفتگو کی گئی۔