یوم دفاع و شہداء پر وزیراعظم شہباز شریف کا مسلح افواج اور شہداء کو خراجِ عقیدت

اسلام آباد، یورپ ٹوڈے: وزیراعظم محمد شہباز شریف نے یوم دفاع و شہداء کے موقع پر اپنے پیغام میں پاکستان کی مسلح افواج اور شہداء کو شاندار خراجِ عقیدت پیش کرتے ہوئے قومی خودمختاری کے تحفظ، بیرونی خطرات کا مقابلہ کرنے اور ایک متحد و خوشحال مستقبل کی تعمیر کے عزم کا اعادہ کیا۔

وزیراعظم نے کہا کہ 6 ستمبر ملکی تاریخ میں جرات، اتحاد اور استقامت کی علامت کے طور پر ہمیشہ یاد رکھا جائے گا۔ انہوں نے 1965 کی جنگ کو یاد کرتے ہوئے کہا کہ پاکستان کی بہادر مسلح افواج نے عوام کی بھرپور حمایت کے ساتھ دشمن کی جارحیت کو ناکام بنایا اور ثابت کیا کہ وطنِ عزیز اپنی آزادی اور سالمیت کے دفاع کی بھرپور صلاحیت رکھتا ہے۔

انہوں نے حالیہ آپریشن بنیان المرصوص، معرکۂ حق کا حوالہ دیتے ہوئے پاک فوج، بحریہ اور فضائیہ کی پیشہ ورانہ صلاحیتوں اور جنگی مہارت کو خراج تحسین پیش کیا اور کہا کہ چیف آف آرمی اسٹاف جنرل سید عاصم منیر کی اسٹریٹجک قیادت میں افواج پاکستان نے بے مثال کارکردگی دکھائی۔ وزیراعظم نے کہا کہ قوم اپنے شہداء کی قربانیوں اور غازیوں کی جرات پر فخر کرتی ہے اور ان کی مثال آنے والی نسلوں کے لیے ہمیشہ مشعلِ راہ رہے گی۔

وزیراعظم نے امن اور تعمیری بین الاقوامی روابط کے عزم کا اظہار کرتے ہوئے متنبہ کیا کہ “بھارت کی مسلسل اشتعال انگیزیوں اور بدلتی ہوئی علاقائی صورتحال کو نظرانداز نہیں کیا جا سکتا۔” انہوں نے اس عزم کا اعادہ کیا کہ پاکستان اپنی دفاعی صلاحیتوں کو مزید مستحکم کرتا رہے گا اور غیر ملکی سرپرستی میں ہونے والی دہشت گردی اور پراکسی جنگوں کا ڈٹ کر مقابلہ کرے گا۔ ان کا کہنا تھا کہ “ہماری مسلح افواج اور قانون نافذ کرنے والے اداروں نے انتہا پسندی اور دہشت گردی کے خاتمے میں نمایاں کامیابیاں حاصل کی ہیں اور قوم اس مشن کی تکمیل تک ان کے ساتھ کھڑی ہے۔”

وزیراعظم نے مقبوضہ جموں و کشمیر کے مظلوم عوام کے ساتھ اظہارِ یکجہتی کرتے ہوئے کہا کہ کشمیریوں کی جدوجہد برائے حقِ خودارادیت کو طاقت کے ذریعے دبایا نہیں جا سکتا۔ انہوں نے فلسطین میں جاری اسرائیلی جارحیت کی بھی سخت مذمت کی اور عالمی برادری پر زور دیا کہ وہ شہریوں کے تحفظ کو یقینی بنائے اور غزہ کے لیے بلا تعطل انسانی امداد کی فراہمی ممکن بنائے۔

وزیراعظم شہباز شریف نے زور دیا کہ ایک مضبوط دفاع کے لیے معاشی استحکام ناگزیر ہے۔ انہوں نے قوم سے اپیل کی کہ وہ ذاتی اختلافات سے بالاتر ہو کر اجتماعی طور پر پائیدار خوشحالی اور خود انحصاری کے لیے کام کرے۔

انہوں نے کہا، “یوم دفاع و شہداء کے موقع پر آئیں ہم قائداعظم کے ایمان، اتحاد اور قربانی کے سنہری اصولوں کی تجدید کریں اور ایک محفوظ، متحد اور خوشحال پاکستان کے لیے مل کر آگے بڑھیں۔ پاکستان آرڈ فورسز زندہ باد، پاکستان پائندہ باد۔”