صدر آصف علی زرداری کی کمیونسٹ پارٹی آف چائنا کے پہلے نیشنل کانگریس میموریل کا دورہ
شانگھائی، یورپ ٹوڈے: صدرِ پاکستان آصف علی زرداری نے پیر کے روز چین کی کمیونسٹ پارٹی (سی پی سی) کے پہلے نیشنل کانگریس میموریل کا دورہ کیا۔ اس موقع پر خاتونِ اول بی بی آصفہ بھٹو زرداری اور چیئرمین پاکستان پیپلز پارٹی بلاول بھٹو زرداری بھی ان کے ہمراہ تھے۔
یہ میموریل شانگھائی کے تاریخی فرنچ کنسیشن علاقے میں واقع ہے، جہاں جولائی 1921 میں سی پی سی کا بانی اجلاس منعقد ہوا تھا۔ صدر زرداری نے شیکومن طرز کی اصل عمارت اور متصل نمائش ہال کا دورہ کیا، جہاں تاریخی نوادرات اور دستاویزات محفوظ ہیں۔
تقریباً 104 برس قبل اسی مقام پر پارٹی کا پہلا اجلاس منعقد ہوا تھا، جس میں 13 رہنماؤں نے شرکت کی تھی، جن میں چیئرمین ماؤ زے تنگ بھی شامل تھے۔ اسی مقام سے پارٹی کی بنیاد رکھی گئی جس نے چین کو آزادی دلائی، غربت اور پسماندگی سے نکالا اور آج اسے ایک بڑی عسکری، تکنیکی اور اقتصادی قوت بنا دیا۔
صدر زرداری نے وزیٹرز بک میں اپنے تاثرات درج کرتے ہوئے کہا:
“یہ میرے لیے اعزاز کی بات ہے کہ میں اس تاریخی مقام پر آیا ہوں جہاں کمیونسٹ پارٹی آف چائنا کی بنیاد رکھی گئی۔ میں پاکستان کے عوام کی جانب سے چین کے اُس سفر کو خراجِ تحسین پیش کرتا ہوں جس نے اسے ایک بڑی عالمی طاقت بنایا۔ صدر شی جن پنگ کی بصیرت افروز قیادت میں یہ دوستی مزید پروان چڑھی ہے اور یہ ہر موسم کی شراکت داری ہے۔ ہمارے تاریخی تعلقات مزید مضبوط اور فروغ پاتے رہیں گے۔”
صدر زرداری نے میموریل کی حفاظت اور تاریخی ورثے کو محفوظ رکھنے کے اقدامات کو سراہا اور کہا کہ یہ مقام جدید چین کی بنیاد رکھنے والی جدوجہد کو سمجھنے میں مدد فراہم کرتا ہے۔ یہ میموریل قومی ثقافتی ورثے کے طور پر تسلیم کیا جاتا ہے اور شانگھائی کے نمایاں تاریخی مقامات میں شمار ہوتا ہے۔
اس موقع پر سینیٹر سلیم مانڈوی والا، صوبائی وزیر اطلاعات و ٹرانسپورٹ شرجیل میمن، صوبائی وزیر منصوبہ بندی و توانائی سید ناصر شاہ، چین کے پاکستان میں سفیر جیانگ ژائی دونگ اور پاکستان کے چین میں سفیر خلیل ہاشمی بھی موجود تھے۔
