دی گلف آبزرور، دی گلف آبزرور ریسرچ فورم اور سفارت خانہ ترکمانستان، اسلام آباد کا “ترکمانستان کی مستقل غیرجانبداری کے 30 سال” کے موقع پر گول میز کانفرنس کا انعقاد
اسلام آباد، یورپ ٹوڈے: یورپ ٹوڈے: دی گلف آبزرور، دی گلف آبزرور ریسرچ فورم اور اسلام آباد میں ترکمانستان کے سفارت خانے نے ادارہ فروغ اردو (NLPD) میں ایک گول میز کانفرنس کا انعقاد کیا۔ اس کانفرنس کا مقصد ترکمانستان کی مستقل غیرجانبداری کے 30ویں سالگرہ کی یاد منانا تھا، جو ترکمانستان کی خارجہ پالیسی کی اساس اور امن، مکالمے اور تعاون کی ایک روشن علامت ہے۔
اس باوقار تقریب میں پاکستان اور بیرونِ ملک سے ممتاز سفارتکاروں، ماہرین تعلیم، صحافیوں، پالیسی سازوں اور دانشوروں نے شرکت کی۔ یہ تقریب پاکستان اور ترکمانستان کے مابین بڑھتے ہوئے فکری و ثقافتی تعلقات کی مظہر تھی، جو مشترکہ تاریخ، علاقائی تعاون اور باہمی احترام پر استوار ہیں۔
تقریب کے مہمانِ خصوصی عالی مرتبت اتاجان مولاموف، سفیرِ ترکمانستان برائے پاکستان تھے، جن کا استقبال ڈاکٹر راشد حمید، ایگزیکٹو ڈائریکٹر نیشنل لینگویج پروموشن ڈیپارٹمنٹ (NLPD) اور جناب محمد علی پاشا، سرپرستِ اعلیٰ دی گلف آبزرور نے کیا۔
بعد ازاں اقوامِ متحدہ کے پاکستان میں ریذیڈنٹ کوآرڈینیٹر عالی مرتبت محمد یحییٰ کا بھی استقبال جناب محمد علی پاشا، ڈاکٹر راشد حمید اور دی گلف آبزرور کی ایڈیٹر اِن چیف محترمہ فاطمة زهراء نے کیا۔
تقریب کا آغاز ترکمانستان اور پاکستان کے قومی ترانوں سے ہوا، جس کے بعد حافظ انعام صاحب نے تلاوتِ کلامِ پاک پیش کی۔
افتتاحی کلمات
اپنے افتتاحی کلمات میں ڈاکٹر راشد حمید نے عالی مرتبت قربان قلی بردی محمدوف، ترکمان عوام کے قومی رہنما، اور عالی مرتبت سردار بردی محمدوف، صدرِ ترکمانستان کو خراجِ تحسین پیش کیا۔ انہوں نے ترکمان قیادت کی پالیسیوں کو سراہتے ہوئے کہا کہ ان کی بصیرت اور قیادت نے ملک کو پائیدار ترقی، ثقافتی احیاء، اور بین الاقوامی سطح پر امن و غیرجانبداری کی بنیاد پر سفارت کاری کی راہ دکھائی ہے۔
برسلز سے محترمہ دریاسوئیسال کا ریکارڈ شدہ پیغام سنایا گیا، جس میں ترکمانستان کی غیرجانبداری اور عالمی امن کے لیے کوششوں کو سراہا گیا۔
علمی و فکری تاثرات
اس کے بعد محترمہ یسریٰ نثار نے ترکمانستان کی غیرجانبداری کی سفارتی پالیسی پر روشنی ڈالی، جبکہ مسٹر عمران یوسف نے کہا کہ ترکمانستان کی غیرجانبداری دراصل مکالمے کو تصادم پر فوقیت دینے اور امن کو تنازعے پر ترجیح دینے کا باشعور انتخاب ہے۔
ڈاکٹر غزالہ خان، نمائندہ نیشنل ووکیشنل اینڈ ٹیکنیکل ٹریننگ کمیشن (NAVTTC) نے ترکمانستان کی انسانی ترقی پر مبنی پالیسیوں کو پاکستان کے نوجوانوں کی تعلیم و تربیت کے وژن کے ساتھ جوڑا۔
مسٹر حماد حسن نے کہا کہ غیرجانبداری کمزوری نہیں بلکہ دانشمندی ہے — ایک ایسا حوصلہ جو بڑھتی ہوئی تقسیم کے دور میں تعاون کو فروغ دیتا ہے۔
محترمہ فاطمہ تُز زہرہ، ایڈیٹر اِن چیف دی گلف آبزرور نے اپنے اختتامی کلمات میں ترکمانستان کی غیرجانبداری کے تسلسل کو سراہا۔ انہوں نے کہا کہ دسمبر 12 ترکمانستان میں یومِ غیرجانبداری کے طور پر منایا جاتا ہے، جو اقوامِ متحدہ کی جانب سے ترکمانستان کی غیرجانبدار حیثیت کے 30 سال مکمل ہونے کی علامت ہے، اور یہ اصول اب ترکمانستان کے آئین کا حصہ بن چکا ہے۔
بیریسٹر زوپاش خان نے ترکمانستان کو ’’عملی غیرجانبداری کی زندہ مثال‘‘ قرار دیا۔ انہوں نے کہا کہ TAPI جیسے منصوبے ہمارے مشترکہ علاقائی ترقی، روابط اور پائیدار خوشحالی کے وژن کو ظاہر کرتے ہیں۔
ایڈووکیٹ عادل قاضی نے سال 2025 — امن و اعتماد کا سال کی قانونی و سفارتی اہمیت پر اظہارِ خیال کیا۔
راجہ عبدالقیوم، سابق ڈائریکٹر جنرل، ڈی جی الیکٹرانک میڈیا اینڈ پبلیکیشنز، نے اشک آباد کے ثقافتی ورثے پر گفتگو کی اور فیض احمد فیض کا کلام سنایا۔
سینئر صحافی محمد نواز رضا نے ترکمانستان کی آزادی کے بعد کے سفر پر روشنی ڈالتے ہوئے سپرمورات نیازوف (ترکمان باشی)، قربان قلی بردی محمدوف اور صدر سردار بردی محمدوف کی قیادت کو خراجِ تحسین پیش کیا۔
اس نشست کی نظامت جناب محمد علی پاشا نے کی، جنہوں نے معروف شخصیت اور مصنف جناب خالد تیمور اکرم کی غیرحاضری کو محسوس کیا اور ان کی صحافت میں نمایاں خدمات کو سراہا۔
عالی مرتبت محمد یحییٰ، اقوام متحدہ کے ریذیڈنٹ کوآرڈینیٹر پاکستان نے کہا کہ "آج کی یہ تقریب ہمیں یاد دلاتی ہے کہ غیر جانب داری، جیسا کہ ترکمانستان نے فروغ دیا، کوئی غیر فعال تصور نہیں بلکہ امن، مکالمے اور باہمی سمجھ بوجھ کا مؤثر ذریعہ ہے۔ ایسے دور میں جب دنیا میں عدم اعتماد اور تقسیم بڑھ رہی ہے، اقوام کے درمیان اعتماد سازی ہماری مشترکہ بقا کے لیے ناگزیر ہے۔ اقوامِ متحدہ اپنے عزم پر قائم ہے کہ اصولوں کو عملی اقدامات میں بدلا جائے — باہمی تعاون، شمولیت اور حقیقی ترقی کے ذریعے۔ آئیں ہم اس اعتماد کو مضبوط کریں جو امن اور انسانیت کی بنیاد ہے۔”
عالی مرتبت اتاجان مولاموف، سفیرِ ترکمانستان برائے پاکستان، نے اپنے کلیدی خطاب میں ترکمانستان کی پالیسیِ غیرجانبداری کو ایک جامع سفارتی نظریے کے طور پر پیش کیا۔ انہوں نے اقوام متحدہ کی قراردادوں کے ذریعے ترکمانستان کی غیرجانبداری کے تاریخی پس منظر کو بیان کیا اور کہا کہ غیرجانبداری اب ترکمانستان کی خارجہ پالیسی کا بنیادی ستون بن چکی ہے، جو دنیا میں تعاون، مکالمے اور باہمی اعتماد کو فروغ دینے کا ذریعہ ہے۔
انہوں نے عشق آباد میں اقوام متحدہ کے ریجنل سینٹر برائے انسدادی سفارت کاری، گروپ آف فرینڈز آف نیوٹرالٹی، اور انٹرنیشنل فورم آن پیس اینڈ ٹرسٹ 2025 کے قیام پر روشنی ڈالی۔ انہوں نے TAPI پائپ لائن جیسے منصوبوں کو اقتصادی تعاون کے ذریعے امن کو فروغ دینے کی مثال قرار دیا۔
اپنی تقریر کے اختتام پر انہوں نے ترکمانستان اور پاکستان کی دوستی کو سراہتے ہوئے نعرہ لگایا:
“ترکمانستان – پاکستان دوستی زندہ باد!”
اختتامی کلمات
ڈاکٹر سلیم مظهر، ڈائریکٹر جنرل NLPD اور شریکِ صدرِ اجلاس نے فارسی ادب اور ترکمان ثقافتی ورثے کے مابین ربط پر گفتگو کی اور تمام شرکاء کا شکریہ ادا کیا۔
جناب ملک محمد شفیق، صدرِ اجلاس نے اپنے جامع اظہارِ خیال میں عالی مرتبت اتاجان مولاموف، عالی مرتبت محمد یحییٰ اور دیگر ممتاز مقررین کا شکریہ ادا کیا۔ انہوں نے دی گلف آبزرور اور NLPD کی انتظامیہ کو اس کامیاب اور بامعنی فکری اجتماع کے انعقاد پر مبارکباد پیش کی۔
اختتامی تقریب اور اسناد کی تقسیم
کانفرنس کا اختتام کلیدی مقررین اور شریک محققین میں اسناد کی تقسیم سے ہوا۔ اسناد پیش کرنے کی سعادت عالی مرتبت اتاجان مولاموف، عالی مرتبت محمد یحییٰ، ڈاکٹر سلیم مظہراور جناب محمد علی پاشا نے مشترکہ طور پر انجام دی۔
تقریب میں نامور شخصیات نے شرکت کی، جن میں راجہ جاوید، ڈاکٹر فرحت آصف، جناب نثار چوہدری، جناب طاہر فاروق، محترمہ سعدیہ عامر، جناب رانا کوثر، جناب محمد نعیم قریشی، ڈاکٹر رابعہ کیانی، جناب صفیر شاہ اور جناب شمس عباسی (اے پی پی) اور دیگرشامل تھے۔
تقریب اس پیغام کے ساتھ اختتام پذیر ہوئی کہ غیرجانبداری اور امن ایک دوسرے کے لازم و ملزوم اقدار ہیں — جو دنیا میں استحکام، تعاون اور شمولیت پر مبنی عالمی نظام کے لیے ناگزیر ہیں۔
