سربراہ پاک فضائیہ کی قیادت میں دبئی ایئر شو 2025 کے موقع پر عالمی فضائی شراکت داری میں مضبوط روابط
اسلام آباد، یورپ ٹوڈے: دبئی ایئر شو 2025 کے موقع پر سربراہ پاک فضائیہ ائیر چیف مارشل ظہیر احمد بابر سدھو کی دوست ممالک کے فضائی سربراہان اور متحدہ عرب امارات کی اعلیٰ عسکری قیادت کے مابین سلسلہ وار اعلیٰ سطحی ملاقاتیں ہوئیں۔ ان ملاقاتوں میں عسکری تعاون کے فروغ، تربیتی اور عملی اشتراک میں وسعت، اور مستقبل کے حوالے سے فضائی قوت کی ترقی، ایرو اسپیس ٹیکنالوجیز اور پیشہ ورانہ تبادلوں کے نئے مواقعوں کے حصول پر تفصیلی گفتگو کی گئی۔
بعد ازاں سربراہ پاک فضائیہ نے متحدہ عرب امارات کے انڈر سیکرٹری برائے دفاع لیفٹیننٹ جنرل پائلٹ ابراہیم ناصر العلاوی اور کمانڈر یو اے ای ائیر فورس اینڈ ائیر ڈیفنس میجر جنرل راشد محمد الشمسی سے بھی جامع ملاقاتیں کیں۔ ان ملاقاتوں میں خطے کی بدلتی ہوئی جیو اسٹریٹجک صورتِ حال کا جائزہ لیا گیا اور دوطرفہ دفاعی تعاون کو مزید مضبوط بنانے کے عزم کا اعادہ کیا گیا۔ گفتگو کا محور اعلیٰ تربیت کے شعبوں میں تعاون کا فروغ، ابھرتی ہوئی ایرو اسپیس ٹیکنالوجیز میں اشتراک اور آپریشنل ہم آہنگی کے نظام کو مزید موثر بنانا رہا۔ اماراتی عسکری قیادت نے پاک فضائیہ کی جدت طرازی، بڑھتی ہوئی مقامی صلاحیتوں اور مقامی ترقی کو سراہتے ہوئے مشترکہ مشقوں، پیشہ ورانہ تبادلوں اور مستقبل کی بین العسکری شراکت داریوں کو مزید استوار کرنے کے عزم کا اظہار کیا۔
پاکستان ایئر فورس کا دستہ دبئی ایئر شو 2025 میں شرکت کے لیے متحدہ عرب امارات میں موجود ہے۔ یہ شرکت پاکستان ایئر فورس کی پیشہ ورانہ صلاحیت، عالمی فضائی برادری کے ساتھ مضبوط روابط اور خطے میں امن و استحکام کے عزم کی نمایاں ترجمانی کرتی ہے۔ ایئر شو کے دوران جے ایف–17 تھنڈر بلاک تھری طیارہ خصوصی توجہ کا مرکز رہا جہاں دفاعی تجزیہ کاروں، ہوا بازی کے ماہرین و شایقین نے اس میں گہری دلچسپی ظاہر کی۔ جدید ٹیکنالوجی، مضبوط جنگی صلاحیتوں اور معرکہء حق میں اس کی ثابت شدہ عملی کارکردگی نے جے ایف–17 تھنڈر کو ایک قابلِ اعتماد اور کم لاگت کثیر المقاصد لڑاکا طیارے کے طور پر مزید نمایاں کیا ہے۔ جدید اویونکس اور موثر اسلحہ جاتی انضمام نے اسے جدید فضائی طاقت کے پلیٹ فارمز میں ایک مضبوط مقام فراہم کیا۔ پاکستان کی ایوی ایشن انڈسٹری پر بڑھتے ہوئے بین الاقوامی اعتماد کے باعث مختلف ممالک نے جے ایف–17 تھنڈر میں دلچسپی کا اظہار کیا۔ اس موقع پر ایک دوست ملک کے ساتھ جے ایف–17 تھنڈر کی خریداری سے متعلق مفاہمتی یادداشت پر بھی دستخط کیے گئے جو پاکستان کے بڑھتے ہوئے دفاعی اور صنعتی تعاون میں ایک نمایاں سنگِ میل ہے۔ یہ معاہدہ طیارے کی عالمی مقبولیت اور پاکستان کی ایرو اسپیس صلاحیتوں پر مستقل بین الاقوامی اعتماد کا مظہر ہے۔
سربراہ پاک فضائیہ کے تزویراتی روابط اور پاک فضائیہ کے دستے کی ہوا بازی کے اعلیٰ پلیٹ فارم میں شرکت، نہ صرف پاک فضائیہ کی پیشہ ورانہ بہترین کارکردگی اور تکنیکی ترقی کو اجاگر کرتی ہے بلکہ عالمی ایرو اسپیس برادری میں اسکے مضبوط، فعال اور مستقبل بین کردار کی بھی عکاسی کرتی ہے۔
