وزیرِ اعظم شہباز شریف کی الیکٹرک وہیکلز کے فروغ کے لیے جامع فنانشل ماڈل کی تیاری کی ہدایت
Read Time:1 Minute, 19 Second
اسلام آباد، یورپ ٹوڈے: وزیرِ اعظم شہباز شریف نے الیکٹرک وہیکلز کے استعمال کو فروغ دینے کے حوالے سے جامع فنانشل ماڈل پیش کرنے کی ہدایت کر دی ہے۔ وزیرِ اعظم کی زیرِ صدارت منعقدہ اجلاس میں الیکٹرک گاڑیوں کے فروغ اور استعمال سے متعلق اہم فیصلے کیے گئے۔ اس موقع پر شہباز شریف نے وفاقی وزارتِ خزانہ اور اسٹیٹ بینک سے مشاورت کرنے کی ہدایت بھی دی۔
اجلاس کے دوران وزیرِ اعظم نے نیشنل الیکٹرک وہیکلز پالیسی کو نومبر تک مکمل کرنے اور ملک میں الیکٹرک گاڑیوں کی تیاری سے متعلق لائسنسنگ کے قواعد و ضوابط کو مزید بہتر بنانے کے لیے اقدامات اٹھانے کی ضرورت پر زور دیا۔
شہباز شریف نے کہا کہ حکومت ملک میں الیکٹرک گاڑیوں کے فروغ کو اپنی ترجیحات میں شامل کیے ہوئے ہے۔ انہوں نے کہا کہ بجلی سے چلنے والی گاڑیوں کے استعمال سے پیٹرول اور ڈیزل کی درآمدات میں زرِ مبادلہ کی بچت ہو گی اور یہ گاڑیاں ماحول دوست بھی ثابت ہوں گی۔
مزید برآں، وزیرِ اعظم نے تمام صوبوں، وفاقی اکائیوں اور اسٹیک ہولڈرز سے مشاورت کے عمل کو شامل کرتے ہوئے الیکٹرک وہیکلز پالیسی کو مضبوط بنانے کی ہدایت دی۔ انہوں نے اعلان کیا کہ سرکاری اسکولوں کے اچھی کارکردگی دکھانے والے طلباء میں الیکٹرک بائیکس تقسیم کی جائیں گی اور آئندہ تمام وفاقی سرکاری اداروں میں صرف الیکٹرک بائیکس کی خریداری کی جائے گی۔
وزیرِ اعظم نے سی ڈی اے کو بھی ہدایت جاری کی کہ وہ اسلام آباد میں الیکٹرک ٹرانسپورٹ سے متعلق جامع پلان پیش کرے، تاکہ دارالحکومت میں بھی ماحول دوست سفری سہولیات فراہم کی جا سکیں۔
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0 
