عالمی شہرت یافتہ اطالوی فیشن ڈیزائنر ویلنٹینو گراوانی انتقال کر گئے
روم، یورپ ٹوڈے: عالمی شہرت یافتہ اطالوی فیشن ڈیزائنر اور معروف برانڈ ویلنٹینو کے بانی ویلنٹینو گراوانی 93 برس کی عمر میں انتقال کر گئے۔ ان کی فاؤنڈیشن نے پیر کے روز ان کے انتقال کی تصدیق کی۔ وہ 2008 میں عملی فیشن ڈیزائننگ سے ریٹائر ہو گئے تھے۔
فاؤنڈیشن کی جانب سے انسٹاگرام پر جاری بیان میں کہا گیا کہ “ویلنٹینو گراوانی آج اپنے روم میں واقع رہائش گاہ پر اپنے اہلِ خانہ اور عزیزوں کی موجودگی میں انتقال کر گئے۔”
بیان کے مطابق بدھ اور جمعرات کو ان کی میت کو دیدار کے لیے رکھا جائے گا، جبکہ آخری رسومات جمعہ کے روز صبح 11 بجے روم میں ادا کی جائیں گی۔
ویلنٹینو گراوانی نے ہاؤٹ کُتُور کی دنیا میں نمایاں مقام حاصل کیا، ایک وسیع کاروباری سلطنت قائم کی اور فیشن کی دنیا کو ایک منفرد رنگ متعارف کرایا، جو “ویلنٹینو ریڈ” کے نام سے عالمی سطح پر پہچانا جاتا ہے۔ میڈیا رپورٹس کے مطابق ان کی تخلیقات نے دہائیوں تک عالمی فیشن کے رجحانات پر گہرا اثر ڈالا۔
ویلنٹینو کو جیورجیو ارمانی اور کارل لاگر فیلڈ جیسے عظیم ڈیزائنرز کے ہم عصر شمار کیا جاتا تھا—وہ عہد جس میں فیشن ایک خالص تخلیقی صنعت سمجھی جاتی تھی، اس سے قبل کہ یہ ایک مکمل طور پر عالمی اور کمرشل صنعت کی شکل اختیار کرے۔ کارل لاگر فیلڈ 2019 میں انتقال کر گئے تھے۔
ویلنٹینو گراوانی کے انتقال سے عالمی فیشن انڈسٹری ایک عہد ساز شخصیت سے محروم ہو گئی ہے۔
