نائب وزیراعظم اسحاق ڈار کا اقوام متحدہ کے آئی ٹی و ٹیلی کمیونی کیشن اداروں سے پاکستان کے روابط مضبوط بنانے پر زور

اسلام آباد، یورپ ٹوڈے: نائب وزیراعظم اور وزیر خارجہ سینیٹر اسحاق ڈار نے بدھ کے روز اقوام متحدہ کے اُن اداروں کے ساتھ پاکستان کے روابط کو مزید مؤثر بنانے کی ضرورت پر زور دیا جو انفارمیشن ٹیکنالوجی اور ٹیلی کمیونی کیشن کے شعبوں سے متعلق ہیں۔ انہوں نے کہا کہ اس مقصد کے لیے تمام متعلقہ فریقوں کے درمیان مربوط اور ہم آہنگ حکمتِ عملی اختیار کرنا ناگزیر ہے۔

وہ انفارمیشن ٹیکنالوجی اور ٹیلی کمیونی کیشن کے شعبوں سے وابستہ کثیرالجہتی فورمز میں پاکستان کی موجودگی اور کردار کا جائزہ لینے کے لیے منعقدہ اجلاس کی صدارت کر رہے تھے۔

اجلاس میں وفاقی وزیر برائے آئی ٹی شزا فاطمہ خواجہ، وزیر اعظم کے خصوصی معاون طارق بجوا، سیکریٹری خارجہ سفیر آمنہ بلوچ، سیکریٹری آئی ٹی، جنیوا میں اقوام متحدہ کے لیے پاکستان کے مستقل نمائندے اور متعلقہ محکموں کے دیگر سینئر حکام نے شرکت کی۔

اجلاس کے دوران پاکستان کی عالمی فورمز میں شمولیت، پالیسی ہم آہنگی اور ادارہ جاتی تعاون کو مزید مضبوط بنانے کے پہلوؤں پر تبادلہ خیال کیا گیا، تاکہ عالمی سطح پر آئی ٹی اور ٹیلی کمیونی کیشن کے شعبوں میں پاکستان کے مفادات کا مؤثر انداز میں تحفظ اور فروغ یقینی بنایا جا سکے۔