اقوامِ متحدہ کے سیکریٹری جنرل کی اسلام آباد مسجد حملے کی شدید مذمت
نیویارک: اقوامِ متحدہ کے سیکریٹری جنرل انتونیو گوتریس نے پاکستان کے دارالحکومت اسلام آباد میں ایک مسجد پر ہونے والے حملے کی سخت الفاظ میں مذمت کی ہے۔ یہ بات اقوامِ متحدہ کے نائب ترجمان کی جانب سے جاری بیان میں کہی گئی۔
اقوامِ متحدہ کے نائب ترجمان فرحان حق کے مطابق سیکریٹری جنرل نے نمازیوں کو نشانہ بنانے والے اس حملے کو شدید ترین الفاظ میں قابلِ مذمت قرار دیا اور کہا کہ شہریوں اور عبادت گاہوں پر حملے کسی صورت برداشت نہیں کیے جا سکتے۔ انہوں نے اس امر پر زور دیا کہ اس واقعے کے ذمہ داروں کی نشاندہی کی جائے اور انہیں انصاف کے کٹہرے میں لایا جائے۔
انتونیو گوتریس نے جاں بحق افراد کے لواحقین سے دلی تعزیت کا اظہار کیا اور زخمیوں کی جلد اور مکمل صحتیابی کے لیے نیک تمناؤں کا اظہار کیا۔
سیکریٹری جنرل نے دہشت گردی اور پرتشدد انتہاپسندی کے خلاف کوششوں میں اقوام متحدہ کی جانب سے حکومت اور عوامِ پاکستان کے ساتھ مکمل یکجہتی کا اعادہ بھی کیا۔
