وزیرِ اعظم شہباز شریف دو روزہ سرکاری دورے پر ویانا روانہ، اعلیٰ سطحی ملاقاتیں اور کاروباری فورم میں شرکت کریں گے
اسلام آباد،یورپ ٹوڈے: وزیرِ اعظم پاکستان شہباز شریف آسٹریا کے چانسلر کی دعوت پر دو روزہ سرکاری دورے کے لیے ویانا روانہ ہو گئے ہیں۔ اس دورے کا مقصد پاکستان اور آسٹریا کے درمیان دوطرفہ تعلقات کو مزید مستحکم بنانا اور اقتصادی و سفارتی تعاون کو فروغ دینا ہے۔
وزیرِ اعظم کے ہمراہ نائب وزیرِ اعظم اسحاق ڈار، وفاقی وزیر عطا تارڑ اور معاونِ خصوصی طارق فاطمی بھی وفد میں شامل ہیں۔ دورے کے دوران وزیرِ اعظم ویانا میں آسٹریا کے چانسلر سے ون آن ون اور وفود کی سطح پر ملاقات کریں گے، جس میں باہمی دلچسپی کے امور، تجارت، سرمایہ کاری اور علاقائی و عالمی صورتحال پر تبادلہ خیال کیا جائے گا۔
دونوں رہنما سرمایہ کاری کے فروغ کے لیے منعقدہ کاروباری شخصیات کے اجلاس کی مشترکہ صدارت بھی کریں گے، جبکہ وزیرِ اعظم پاکستان آسٹریا بزنس فورم میں شرکت اور خطاب کریں گے۔ اس موقع پر دونوں ممالک کے تاجروں اور سرمایہ کاروں کے درمیان روابط بڑھانے پر زور دیا جائے گا۔
دورے کے دوران وزیرِ اعظم اقوام متحدہ کے زیرِ اہتمام “پائیدار ترقی، عالمی امن و خوشحالی کا راستہ” کے موضوع پر منعقدہ خصوصی تقریب میں بھی شرکت کریں گے، جہاں وہ عالمی برادری کے سامنے پاکستان کا مؤقف پیش کریں گے۔
علاوہ ازیں، وزیرِ اعظم انٹرنیشنل اٹامک انرجی ایجنسی کے ڈائریکٹر جنرل سے بھی ملاقات کریں گے، جس میں جوہری توانائی کے پرامن استعمال اور تکنیکی تعاون سے متعلق امور زیرِ بحث آئیں گے۔
یہ دورہ پاکستان اور آسٹریا کے درمیان سیاسی، اقتصادی اور سفارتی تعلقات کو نئی جہت دینے میں اہم پیش رفت قرار دیا جا رہا ہے۔
