وزیراعظم شہباز شریف کی آسٹریا کے وفاقی چانسلر سے تاریخی ملاقات، دوطرفہ تعاون کو نئی جہت دینے پر اتفاق

ویانا،یورپ ٹوڈے: وزیرِاعظم پاکستان شہباز شریف نے پیر کے روز ویانا میں تاریخی ہوف برگ پیلس میں واقع وفاقی چانسلری میں جمہوریہ آسٹریا کے وفاقی چانسلر کرسچن اسٹوکرسے ملاقات کی۔

وزیراعظم کی وفاقی چانسلری آمد پر چانسلر کرسچن اسٹوکر نے ان کا پرتپاک استقبال کیا اور انہیں شاندار گارڈ آف آنر پیش کیا گیا۔ وزیراعظم نے مہمانوں کی کتاب میں اپنے تاثرات بھی قلم بند کیے۔ یہ بات وزیراعظم آفس کی جانب سے جاری بیان میں کہی گئی۔

ملاقات کے آغاز میں دونوں رہنماؤں کے درمیان محدود سطح پر بات چیت ہوئی، جس کے بعد وفود کی سطح پر مذاکرات منعقد ہوئے۔ پاکستانی وفد میں نائب وزیرِاعظم و وزیرِ خارجہ سینیٹراسحاق ڈار، وزیرِ اطلاعات و نشریات عطااللہ تارڑ، وزیرِاعظم کے معاونِ خصوصی سید طارق فاطمی اور خارجہ سیکرٹری آمنہ بلوچ شامل تھیں۔

دونوں رہنماؤں نے پاکستان اور آسٹریا کے درمیان دوستانہ اور تاریخی تعلقات کو یاد کرتے ہوئے اس عزم کا اعادہ کیا کہ دوطرفہ تعلقات کو مزید مستحکم بنانے کے لیے قریبی تعاون جاری رکھا جائے گا۔ اس سلسلے میں اقتصادی تعاون، تجارت و سرمایہ کاری، سیاحت و مہمان نوازی، تعلیم، انفارمیشن ٹیکنالوجی، صحت، انسانی وسائل کی ترقی اور افرادی قوت کی نقل و حرکت سمیت مختلف شعبوں میں تعاون بڑھانے پر اتفاق کیا گیا۔ ان شعبوں سے متعلق زیرِ غور مفاہمتی یادداشتوں (ایم او یوز) کو جلد حتمی شکل دینے پر بھی اتفاق کیا گیا۔

دونوں فریقین نے علاقائی اور عالمی صورتحال پر بھی تبادلہ خیال کیا اور عالمی امن و سلامتی، تنازعات کے پرامن حل، پائیدار ترقی، موسمیاتی اقدامات اور انسانی حقوق کے تحفظ و فروغ کے لیے اقوامِ متحدہ کے مرکزی کردار پر اتفاق کیا۔ انہوں نے کثیرالجہتی نظام کے ساتھ اپنی وابستگی کا اظہار کرتے ہوئے اقوامِ متحدہ کے نظام کو مضبوط بنانے کے لیے عالمی برادری کے ساتھ مل کر کام کرنے کے عزم کا اعادہ کیا۔ اس موقع پر دونوں ممالک نے ایک دوسرے کی امیدواریاں کی حمایت کو سراہا۔

وزیراعظم شہباز شریف اور آسٹریا کے وفاقی چانسلر نے قابلِ تجدید توانائی، توانائی کی بچت، صنعتی پیداوار و تعمیرات، آئی ٹی، ٹیکسٹائل، جراحی آلات، چمڑے اور کھیلوں کے سامان، صحت، سیاحت و مہمان نوازی اور خوراک و زرعی صنعتوں کے شعبوں میں کام کرنے والی سرکردہ آسٹریائی اور پاکستانی کمپنیوں کے چیف ایگزیکٹو افسران کے فورم کی مشترکہ صدارت بھی کی۔

اجلاس میں اس بات پر اتفاق کیا گیا کہ دونوں ممالک کے درمیان حکومت سے حکومت (G2G)، حکومت سے کاروبار (G2B) اور کاروبار سے کاروبار (B2B) روابط کو موجودہ پلیٹ فارمز کے مؤثر استعمال کے ذریعے مزید وسعت دی جائے گی۔

وزیراعظم نے آسٹریا کی کاروباری برادری اور کمپنیوں کو رواں سال اپریل میں اسلام آباد میں منعقد ہونے والے یورپی یونین-پاکستان بزنس فورم میں شرکت کی دعوت دی۔

دورے کے دوران بامقصد اور نتیجہ خیز ملاقاتوں پر وزیراعظم نے وفاقی چانسلر کا شکریہ ادا کیا اور اس امید کا اظہار کیا کہ یہ روابط دوطرفہ تعلقات کو نئی رفتار فراہم کریں گے۔ انہوں نے وفاقی چانسلر کو سہولت کے مطابق جلد از جلد پاکستان کا سرکاری دورہ کرنے کی دعوت بھی دی۔