پاکستان اور قطر کا برادرانہ تعلقات مزید مستحکم بنانے کے عزم کا اعادہ

اسلام آباد،یورپ ٹوڈے: پاکستان اور قطر نے باہمی برادرانہ تعلقات کو مزید مضبوط اور مستحکم بنانے کے عزم کا اعادہ کیا ہے۔

وزیراعظم شہباز شریف اور قطر کے امیر شیخ تمیم بن حمد الثانی کے درمیان ٹیلیفونک رابطہ ہوا، جس میں دونوں رہنماؤں نے ماہِ رمضان کی آمد پر ایک دوسرے کو دلی مبارکباد پیش کی۔

گفتگو کے دوران دونوں رہنماؤں نے پاکستان اور قطر کے درمیان قریبی اور دوستانہ تعلقات پر اطمینان کا اظہار کرتے ہوئے انہیں مزید وسعت دینے کے عزم کا اعادہ کیا۔ وزیراعظم نے مشرقِ وسطیٰ میں قیامِ امن کے لیے قطر کی فعال اور مؤثر سفارتی کوششوں کو سراہا۔

ٹیلیفونک گفتگو میں علاقائی اور عالمی صورتحال پر بھی تفصیلی تبادلہ خیال کیا گیا۔ دونوں رہنماؤں نے خطے میں امن، استحکام اور خوشحالی کے فروغ کے لیے باہمی تعاون جاری رکھنے پر اتفاق کیا۔

رہنماؤں نے اس عزم کا اظہار کیا کہ دونوں ممالک مشترکہ مقاصد کے حصول اور دوطرفہ شراکت داری کو نئی بلندیوں تک لے جانے کے لیے مل کر کام کرتے رہیں گے۔