گریٹر جکارتہ کے مسائل کے حل کے لیے جولائی 2026 میں بین الاقوامی کانفرنس کا انعقاد

Read Time:2 Minute, 14 Second

جکارتہ،یورپ ٹوڈے: انڈونیشیا جولائی 2026 میں ایک بین الاقوامی کانفرنس کی میزبانی کرے گا جس کا مقصد گریٹر جکارتہ ریجن کے بڑھتے ہوئے شہری مسائل کے حل کے لیے مؤثر پالیسی تجاویز تیار کرنا ہے۔ دنیا کے بڑے میٹروپولیٹن علاقوں میں شمار ہونے والے اس خطے کو درپیش چیلنجز سے نمٹنے کے لیے یہ کانفرنس اہم پیش رفت قرار دی جا رہی ہے۔

قومی ترقیاتی منصوبہ بندی کے وزیر رچمت پامبوڈی نے جکارتہ میں جاری بیان میں جبودیتابیک اسٹڈی فورم کی آٹھویں بین الاقوامی کانفرنس کی حمایت کا اظہار کیا۔ اس کانفرنس کا مشترکہ انعقاد نیشنل ریسرچ اینڈ انوویشن ایجنسی (BRIN)، آئی پی بی یونیورسٹی، بانڈونگ انسٹی ٹیوٹ آف ٹیکنالوجی اور کیوٹو یونیورسٹی کریں گے۔

وزیر نے کہا کہ یہ فورم محض ایک علمی اجتماع نہیں ہونا چاہیے بلکہ اسے حکمتِ عملی، پالیسی سازی اور عملی اقدامات کی تشکیل کے لیے ایک مؤثر پلیٹ فارم بننا چاہیے۔ انہوں نے منتظم اداروں کے نمائندوں سے ملاقات کے دوران اس بات پر زور دیا کہ کانفرنس کے نتائج محض نظریاتی مباحث تک محدود نہ رہیں بلکہ قابلِ عمل سفارشات کی صورت میں سامنے آئیں۔

یہ کانفرنس گریٹر جکارتہ کے مربوط نظم و نسق اور انتظامی ڈھانچے کو مضبوط بنانے پر توجہ دے گی۔ جبودیتابیک ریجن میں جکارتہ، بوگور، ڈیپوک، تانگیرانگ اور بیکاسی شامل ہیں اور یہ علاقہ تیزی سے ایک میگا سٹی کی شکل اختیار کر رہا ہے۔

رچمت پامبوڈی نے کہا کہ جکارتہ کو درپیش پیچیدہ شہری مسائل کے پیش نظر وہ اس اقدام کا خیرمقدم کرتے ہیں اور امید ظاہر کرتے ہیں کہ اس سے ٹھوس اور عملی حل سامنے آئیں گے۔ انہوں نے واضح کیا کہ کانفرنس کا ایک اہم موضوع شہری مراکز کی لچک (Resilience) ہوگا، کیونکہ عوامی صحت، معاشی عدم مساوات، سماجی مسائل اور ماحولیاتی تبدیلی جیسے عوامل شہروں پر بڑھتا ہوا دباؤ ڈال رہے ہیں۔

انہوں نے مزید کہا کہ متعدد بڑے میٹروپولیٹن علاقوں کا حامل ملک ہونے کے ناطے انڈونیشیا کو اپنی شہری ترقی کی حکمتِ عملی میں پائیداری اور لچک کو ترجیح دینا ہوگی۔ وزیر نے میگا سٹی گورننس کے بہترین عالمی تجربات کے تبادلے کے امکانات پر بھی روشنی ڈالی، بالخصوص کیوٹو یونیورسٹی کے ساتھ تعاون کے ذریعے پالیسی سازی میں بہتری لانے کی ضرورت پر زور دیا۔

رچمت پامبوڈی نے کہا کہ یہ کانفرنس انڈونیشیا کے 2025 تا 2029 کے قومی وسط مدتی ترقیاتی منصوبے سے ہم آہنگ ہے، جس کے تحت پائیدار معیشت کی تعمیر، کم کاربن اور موسمیاتی تبدیلی سے ہم آہنگ ترقی، مسابقت میں اضافہ اور حکمرانی میں اصلاحات کو فروغ دینا مقاصد میں شامل ہے۔

انہوں نے امید ظاہر کی کہ آٹھویں بین الاقوامی کانفرنس جکارتہ اور اس کے گرد و نواح کی ترقی کے لیے ایک اہم سنگِ میل ثابت ہوگی۔