وزیراعظم شہباز شریف کی ہندو برادری کو ہولی کی مبارک باد، مذہبی ہم آہنگی اور رواداری کے فروغ پر زور
اسلام آباد،یورپ ٹوڈے: وزیرِ اعظم محمد شہباز شریف نے ہندو برادری کو ہولی کے تہوار کی مبارک باد دیتے ہوئے کہا ہے کہ ہولی خوش نما رنگوں کے امتزاج کے ذریعے معاشرتی ہم آہنگی اور باہمی محبت کی عکاسی کرتا ہے۔
ہولی کے موقع پر اپنے خصوصی پیغام میں وزیرِ اعظم نے کہا کہ اس تہوار کی روایات پاکستان کے ثقافتی تنوع اور مذہبی ہم آہنگی کی خوبصورت مثال ہیں۔ انہوں نے پاکستانی ہندو کمیونٹی کو دلی مبارک باد اور نیک تمناؤں کا اظہار کرتے ہوئے کہا کہ ہندو برادری ہمارے معاشرے کا ایک بیش قدر اور قابلِ احترام حصہ ہے۔
وزیرِ اعظم شہباز شریف نے کہا کہ ہندو کمیونٹی ملک میں سماجی ہم آہنگی کے فروغ، معاشی ترقی اور خوش حالی کے ساتھ ساتھ پُرامن بقائے باہمی کے قیام میں مثبت اور قابلِ قدر کردار ادا کر رہی ہے۔
انہوں نے اس بات پر زور دیا کہ آئینِ پاکستان رنگ و نسل، مذہب اور عقیدے کی بنیاد پر کسی بھی قسم کے امتیاز کے بغیر تمام شہریوں کو مذہبی آزادی اور بنیادی انسانی حقوق کی ضمانت دیتا ہے، جبکہ حکومتِ پاکستان تمام اقلیتوں کے آئینی حقوق کے تحفظ کے لیے پرعزم ہے۔
وزیرِ اعظم نے مزید کہا کہ بین المذاہب مکالمے کے فروغ، عبادت گاہوں کے تحفظ اور معاشرے میں باہمی احترام کو مضبوط بنانے کے لیے مشترکہ کوششوں کی ضرورت ہے۔
انہوں نے اپنے پیغام کے اختتام پر کہا کہ آئیے رواداری، ہمدردی اور یکجہتی کے جذبے کے ساتھ ایک پُرامن، شمولیتی اور خوشحال مستقبل کی تعمیر کے لیے مل کر کام کریں۔
