پاکستان اسپورٹس بورڈ نے ساؤتھ ایشین ایتھلیٹکس چیمپئن شپ میں ناکامی پر ایتھلیٹکس فیڈریشن سے وضاحت طلب کرلی

اسلام آباد، یورپ ٹوڈے: پاکستان اسپورٹس بورڈ (پی ایس بی) نے ساؤتھ ایشین ایتھلیٹکس چیمپئن شپ میں پاکستانی ایتھلیٹس کی ناقص کارکردگی پر ایتھلیٹکس فیڈریشن آف پاکستان (اے ایف پی) سے وضاحت طلب کرلی ہے۔ پی ایس بی نے ایک خط کے ذریعے ٹیم کی تیاری اور سلیکشن کے معیار پر سوالات اٹھائے ہیں، جس میں کہا گیا ہے کہ بھارت میں منعقدہ چیمپئن شپ کے نتائج ٹیم کی تشکیل اور سلیکشن پر سنگین سوالات کھڑے کرتے ہیں۔

پی ایس بی نے اے ایف پی سے اس مایوس کن کارکردگی کی وجوہات پیش کرنے اور کھلاڑیوں کے انتخاب کی بنیاد کی وضاحت کرنے کا مطالبہ کیا ہے۔ پی ایس بی کا کہنا ہے کہ یہ جاننا ضروری ہے کہ منتخب کردہ کھلاڑیوں کی تیاری کس طرح کی گئی تھی اور کن معیارات کی بنیاد پر ان کا انتخاب عمل میں آیا۔

پاکستان اسپورٹس بورڈ نے ایتھلیٹکس فیڈریشن کو سات دن کے اندر جواب جمع کروانے کی ہدایت دی ہے۔ اس سے قبل بھی پی ایس بی نے بغیر این او سی کے بھارت میں ہونے والے ایونٹ میں شرکت پر فیڈریشن سے وضاحت طلب کی تھی۔

یاد رہے کہ بھارت میں ہونے والی ساؤتھ ایشین ایتھلیٹکس چیمپئن شپ میں پاکستانی کھلاڑی کوئی میڈل جیتنے میں ناکام رہے تھے اور زیادہ تر کھلاڑی پہلے ہی راؤنڈ میں باہر ہوگئے تھے۔