عید سے قبل ملک بھر میں بارش، آندھی اور گرج چمک کی پیشگوئی

Read Time:2 Minute, 44 Second

اسلام آباد: محکمہ موسمیات پاکستان (پی ایم ڈی) نے پیر کے روز پیشگوئی کی ہے کہ عید کی تعطیلات سے قبل ملک کے مختلف علاقوں میں بارش، گرج چمک اور تیز ہواؤں کا امکان ہے، کیونکہ ایک نیا مغربی ہواؤں کا سلسلہ 17 مارچ کی شام ملک میں داخل ہونے کی توقع ہے۔

محکمہ موسمیات کے مطابق یہ موسمی نظام 17 مارچ کی شام یا رات کو ملک کے مغربی حصوں میں داخل ہوگا اور 18 مارچ تک بتدریج بیشتر علاقوں کو اپنی لپیٹ میں لے لے گا، جبکہ 20 مارچ تک اس کے کمزور ہونے کا امکان ہے۔

بیان میں کہا گیا ہے کہ یہ موسمی تبدیلی مغربی ہواؤں کے سلسلے کے باعث ہے، جو ایک قدرتی موسمی نظام ہے اور عموماً بارش، تیز ہوائیں اور درجہ حرارت میں کمی کا باعث بنتا ہے۔

بلوچستان اس سلسلے سے سب سے پہلے متاثر ہونے والے علاقوں میں شامل ہوگا، جہاں کوئٹہ، زیارت، چمن، پشین، قلعہ عبداللہ، قلعہ سیف اللہ، ژوب، قلات، خضدار، کیچ، گوادر، پنجگور اور آواران میں 17 مارچ کی شام سے 20 مارچ کی صبح تک وقفے وقفے سے بارش، تیز ہوائیں، گرج چمک اور کہیں کہیں ژالہ باری کا امکان ہے۔

خیبر پختونخوا کے مختلف اضلاع، جن میں چترال، دیر، سوات، کالام، پشاور، ایبٹ آباد، مانسہرہ، کوہاٹ، بنوں، ڈیرہ اسماعیل خان اور وزیرستان شامل ہیں، میں بارش اور تیز ہواؤں کے ساتھ گرج چمک جبکہ بالائی علاقوں میں برفباری کی توقع ہے۔ بعض مقامات پر ژالہ باری بھی ہو سکتی ہے۔

پنجاب اور اسلام آباد میں بھی بارش اور تیز ہواؤں کا امکان ہے۔ راولپنڈی، لاہور، فیصل آباد، گوجرانوالہ، سیالکوٹ، سرگودھا اور ساہیوال میں 17 مارچ کی رات سے 20 مارچ کی صبح تک وقفے وقفے سے بارش، گرج چمک اور کہیں کہیں ژالہ باری متوقع ہے، جبکہ جنوبی پنجاب کے علاقوں ملتان، بہاولپور، ڈیرہ غازی خان اور رحیم یار خان میں 18 اور 19 مارچ کو اسی نوعیت کے موسم کا امکان ہے۔

گلگت بلتستان اور آزاد کشمیر میں بھی مطلع ابر آلود رہنے، بارش، گرج چمک اور بالائی علاقوں میں برفباری کی پیشگوئی کی گئی ہے۔ ہنزہ، گلگت، اسکردو، دیامر، مظفرآباد، وادی نیلم، پونچھ، میرپور اور کوٹلی میں بعض مقامات پر تیز بارش متوقع ہے۔

سندھ کے مختلف علاقوں، جن میں کراچی، حیدرآباد، لاڑکانہ، سکھر، جیکب آباد، میرپورخاص، بدین اور ٹھٹھہ شامل ہیں، میں 18 اور 19 مارچ کو مطلع ابر آلود رہنے کے ساتھ بارش اور گرج چمک کا امکان ظاہر کیا گیا ہے۔

محکمہ موسمیات نے خبردار کیا ہے کہ خیبر پختونخوا، گلگت بلتستان اور آزاد کشمیر کے پہاڑی علاقوں میں لینڈ سلائیڈنگ کا خطرہ ہو سکتا ہے، جبکہ گرج چمک کے دوران آسمانی بجلی گرنے کے واقعات بھی پیش آ سکتے ہیں، اس لیے شہری احتیاط کریں اور شدید بارش کے دوران گھروں میں رہیں۔

کاشتکاروں کو ہدایت کی گئی ہے کہ وہ اپنی فصلوں کے تحفظ کے لیے ضروری اقدامات کریں کیونکہ بعض علاقوں میں ژالہ باری سے نقصان کا خدشہ ہے۔ ملک بھر میں دن کے درجہ حرارت میں بھی معمولی کمی متوقع ہے۔

محکمہ موسمیات نے مسافروں اور سیاحوں کو مشورہ دیا ہے کہ وہ عید کے سفر کی منصوبہ بندی موسم کی صورتحال کو مدنظر رکھتے ہوئے کریں اور شدید بارش کے دوران غیر ضروری سفر سے گریز کریں۔

متعلقہ اداروں کو عوام کی حفاظت یقینی بنانے کے لیے الرٹ کر دیا گیا ہے۔