عرفات منہاس کا شاندار ڈیبیو، ون ڈے کرکٹ میں پہلی ہی میچ میں 5 وکٹیں لینے والے پہلے پاکستانی بولر بن گئے
Read Time:1 Minute, 16 Second
راولپنڈی، یورپ ٹوڈے: آسٹریلیا کے خلاف پہلے ایک روزہ بین الاقوامی میچ میں پاکستان کے نوجوان آل راؤنڈر عرفات منہاس نے شاندار کارکردگی کا مظاہرہ کرتے ہوئے تاریخ رقم کر دی۔ 21 سالہ عرفات منہاس اپنے ون ڈے ڈیبیو میچ میں 5 وکٹیں حاصل کرنے والے پاکستان کے پہلے بولر بن گئے ہیں۔
پاکستان کی ایک ہزار ایک روزہ میچوں کی تاریخ میں یہ پہلا موقع ہے کہ کسی پاکستانی بولر نے اپنے ڈیبیو ون ڈے میچ میں پانچ وکٹیں حاصل کی ہوں۔ عرفات منہاس نے اپنے مقررہ 10 اوورز میں 52 رنز دے کر 5 کھلاڑیوں کو آؤٹ کیا اور آسٹریلوی بیٹنگ لائن کو مشکلات سے دوچار رکھا۔
پاکستانی بولرز کی مجموعی شاندار کارکردگی کے باعث آسٹریلیا کی پوری ٹیم 200 رنز پر آؤٹ ہوگئی، جس کے بعد گرین شرٹس کو فتح کے لیے 201 رنز کا ہدف ملا۔
میچ کے بعد گفتگو کرتے ہوئے عرفات منہاس نے اپنی کارکردگی پر خوشی کا اظہار کیا۔ انہوں نے کہا کہ ڈیبیو میچ میں پانچ وکٹیں حاصل کرنا ان کے لیے ایک یادگار لمحہ ہے اور وہ مستقبل میں بھی ایسی ہی کارکردگی دکھانے کی کوشش کریں گے۔ ان کا کہنا تھا کہ بولنگ یونٹ کی کامیابی مشترکہ کوششوں کا نتیجہ ہے۔
اس سے قبل پاکستان کے فاسٹ بولر ذاکر خان نے 1984 میں اپنے ون ڈے ڈیبیو پر 19 رنز کے عوض 4 وکٹیں حاصل کی تھیں، جو طویل عرصے تک پاکستانی بولر کی بہترین ڈیبیو کارکردگی رہی۔ تاہم عرفات منہاس نے پانچ وکٹیں حاصل کرکے یہ ریکارڈ اپنے نام کر لیا۔
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0 
