مریم نواز سے امریکی ناظم الامور کی ملاقات، پنجاب میں مختلف شعبوں میں تعاون بڑھانے پر اتفاق

Read Time:2 Minute, 26 Second

لاہور، یورپ ٹوڈے: امریکہ کی قائم مقام ناظم الامور نیٹلی بیکر نے بدھ کو وزیراعلیٰ پنجاب مریم نواز شریف سے ملاقات کی، جس میں پنجاب میں سکیورٹی، مصنوعی ذہانت، ڈیجیٹل اثاثوں اور توانائی سمیت مختلف شعبوں میں باہمی تعاون بڑھانے پر اتفاق کیا گیا۔

ملاقات کے دوران پنجاب میں تعلیم، سکیورٹی اور سرمایہ کاری کے فروغ سمیت باہمی دلچسپی کے امور پر تفصیلی تبادلہ خیال کیا گیا۔ اس موقع پر پنجاب کو سیلاب اور اسموگ جیسے ماحولیاتی چیلنجز سے نمٹنے میں معاونت کے لیے امریکی ماہرین کی خدمات حاصل کرنے پر بھی اتفاق کیا گیا۔

فریقین نے لاہور میں پنجاب-امریکہ بزنس اینڈ انویسٹمنٹ فورم کے انعقاد کی تجویز کا بھی جائزہ لیا، جس کا مقصد تجارت، سرمایہ کاری اور کاروباری روابط کو مزید فروغ دینا ہے۔

نیٹلی بیکر نے لاہور میں بسنت میلے کے انعقاد کو سراہتے ہوئے اس کے محفوظ انعقاد کے لیے پنجاب حکومت کی جانب سے کیے گئے اقدامات کی تعریف کی۔ انہوں نے کہا کہ انہیں پاکستان بالخصوص پنجاب اور لاہور کے عوام بہت پسند ہیں جو انتہائی زندہ دل ہیں۔

وزیراعلیٰ مریم نواز شریف نے کہا کہ آئندہ سال بسنت میلے کو مزید وسعت دی جائے گی۔

بیان کے مطابق امریکی قائم مقام ناظم الامور نے خواتین کو بااختیار بنانے کے لیے وزیراعلیٰ پنجاب کے مختلف منصوبوں کو بھی خراج تحسین پیش کیا۔

وزیراعلیٰ مریم نواز نے کہا کہ پنجاب میں خواتین کو بااختیار بنانے کے لیے قانونی اقدامات کیے جا رہے ہیں جبکہ صوبائی حکومت ترقی کے فروغ اور ماحولیاتی چیلنجز سے نمٹنے کے لیے مؤثر پالیسیاں تشکیل دے رہی ہے۔

انہوں نے کہا کہ مون سون سے قبل کیے گئے پیشگی اقدامات اور ضلعی سطح پر واسا کے قیام سے بارش کے پانی کی فوری نکاسی ممکن ہوئی ہے۔ پنجاب میں تیزی سے تبدیلیاں رونما ہو رہی ہیں اور شہروں و دیہات کی تعمیر و ترقی پر خصوصی توجہ دی جا رہی ہے۔

وزیراعلیٰ نے کہا کہ پاکستان کی پہلی خاتون وزیراعلیٰ کی حیثیت سے انہوں نے خواتین کو بااختیار بنانے کے عزم کو محض علامتی اقدام تک محدود نہیں رکھا بلکہ اسے عملی اقدامات میں تبدیل کیا ہے۔

انہوں نے بتایا کہ خواتین کی سفری سہولت کے لیے الیکٹرک اسکوٹر اسکیم اور الیکٹرو بس سروس شروع کی گئی ہے جبکہ خواتین کو چھوٹے کاروبار شروع کرنے اور مالی خودمختاری کی جانب بڑھنے میں مدد دینے کے لیے بلاسود قرضے فراہم کیے جا رہے ہیں۔

مریم نواز نے کہا کہ ڈائریکٹ پنک بٹن اور ورچوئل پولیس اسٹیشن خواتین کے تحفظ کے لیے جدید اور منفرد اقدامات ہیں۔

وزیراعلیٰ نے امریکا میں مقیم پنجاب سے تعلق رکھنے والے تقریباً 10 لاکھ پاکستانیوں کو ملک کے لیے قیمتی اثاثہ قرار دیتے ہوئے کہا کہ ان کے ساتھ روابط مزید مضبوط بنانا باہمی مفاد میں ہے۔

دریں اثنا، وزیراعلیٰ مریم نواز شریف نے متعلقہ حکام کو مظفرگڑھ میں کامیاب تجربات کے بعد سرگودھا میں ٹیکنالوجی پر مبنی جھینگا فارمنگ شروع کرنے کے عمل کو تیز کرنے کی ہدایت کی ہے۔