پاکستان اور سعودی عرب کے درمیان اسٹریٹجک اقتصادی شراکت داری کے فروغ پر اتفاق

Read Time:1 Minute, 59 Second

اسلام آباد، یورپ ٹوڈے: وزیراعظم محمد شہباز شریف نے کہا ہے کہ پاکستان سعودی عرب کے ساتھ اپنے اقتصادی تعلقات کو ولی عہد و وزیراعظم شہزادہ محمد بن سلمان کے وژن کے مطابق باہمی مفاد پر مبنی اسٹریٹجک اقتصادی شراکت داری میں تبدیل کرنے کا خواہاں ہے۔

یہ بات انہوں نے منگل کو وزیراعظم ہاؤس میں سعودی پاک مشترکہ کاروباری کونسل کے چیئرمین شہزادہ منصور بن محمد آل سعود کی قیادت میں اعلیٰ سطح کے سعودی کاروباری وفد سے ملاقات کے دوران کہی۔

ملاقات خوشگوار اور دوستانہ ماحول میں ہوئی۔ وزیراعظم نے خادم الحرمین الشریفین شاہ سلمان بن عبدالعزیز آل سعود اور ولی عہد و وزیراعظم شہزادہ محمد بن سلمان کے لیے اپنے نیک خواہشات اور احترام کا پیغام پہنچایا۔

وزیراعظم نے پاکستان اور سعودی عرب کے درمیان دیرینہ برادرانہ تعلقات کا ذکر کرتے ہوئے دونوں ممالک کے درمیان اقتصادی تعاون اور سرمایہ کاری کے فروغ کے مختلف امکانات پر تبادلہ خیال کیا۔

اس موقع پر انہوں نے شہزادہ منصور کے پاکستان کے سابقہ دوروں کا بھی حوالہ دیا اور امید ظاہر کی کہ موجودہ دورہ گزشتہ بات چیت کو آگے بڑھانے اور مختلف شعبوں میں مفاہمت کی یادداشتوں (ایم او یوز) اور معاہدوں پر دستخط کا باعث بنے گا۔

سعودی وفد نے زراعت، بندرگاہوں، شاہراہوں، ہوائی اڈوں کی آؤٹ سورسنگ، رئیل اسٹیٹ، توانائی، بجلی کی تقسیم اور انفارمیشن ٹیکنالوجی سمیت مختلف شعبوں میں سرمایہ کاری کے مواقع میں دلچسپی کا اظہار کیا۔

وزیراعظم نے ترجیحی شعبوں میں سعودی سرمایہ کاری کے اظہارِ دلچسپی کا خیرمقدم کرتے ہوئے کہا کہ پاکستان اور سعودی عرب کے درمیان مشترکہ تعاون، بالخصوص حکومتی سطح (G2G) اور کاروباری سطح (B2B) پر شراکت داری کے لیے یہ انتہائی موزوں وقت ہے۔

شہزادہ منصور بن محمد آل سعود نے وزیراعظم کی جانب سے پرتپاک استقبال پر شکریہ ادا کیا اور پاکستان کے ساتھ کاروباری روابط کو مزید گہرا کرنے میں سعودی حکومت اور کاروباری برادری کی مسلسل دلچسپی کا اعادہ کیا۔

سعودی کاروباری وفد اپنے قیام کے دوران متعدد اعلیٰ حکومتی نمائندوں اور نجی شعبے سے وابستہ اہم اسٹیک ہولڈرز سے بھی ملاقاتیں کرے گا۔

ملاقات میں وفاقی وزراء رانا تنویر حسین، ڈاکٹر مصدق ملک، جام کمال خان، محمد اورنگزیب، عطا اللہ تارڑ، جنید انوار چودھری، علی پرویز ملک، سردار اویس احمد خان لغاری اور محمد حنیف عباسی، وزیراعظم کے مشیران محمد علی اور ہارون اختر خان، وزیر مملکت بلال اظہر کیانی، معاون خصوصی طارق فاطمی اور اعلیٰ سرکاری حکام نے شرکت کی۔