سکیورٹی فورسز نے پاک افغان سرحد پر خوارج کی دراندازی ناکام بنا دی، 15خوارج ہلاک

Read Time:1 Minute, 39 Second

راولپنڈی، یورپ ٹوڈے: سکیورٹی فورسز نے شمالی وزیرستان کے بالمقابل پاک افغان سرحد پر بھارتی سرپرستی میں سرگرم فتنۃ الخوارج کی دراندازی کی کوشش ناکام بناتے ہوئے 15 خوارج کو ہلاک کردیا۔

پاک فوج کے شعبہ تعلقات عامہ (آئی ایس پی آر) کے مطابق سکیورٹی فورسز نے پیشہ ورانہ مہارت اور تحمل کا مظاہرہ کرتے ہوئے دراندازوں کا مؤثر انداز میں مقابلہ کیا۔ بیان کے مطابق 36 گھنٹے تک جاری رہنے والی کارروائی کے دوران درست اور مہارت سے کیے گئے آپریشن میں بھارتی سرپرستی میں سرگرم فتنۃ الخوارج سے تعلق رکھنے والے 15 دہشت گرد ہلاک ہوئے۔

آئی ایس پی آر کے مطابق ہلاک خوارج کے خلاف بعد ازاں کیے گئے کلیئرنس اور سینیٹائزیشن آپریشن کے دوران بڑی مقدار میں اسلحہ اور گولہ بارود بھی برآمد کیا گیا، جس سے خوارج اور ان کے سہولت کاروں کے ملک میں امن و استحکام کو نقصان پہنچانے کے مذموم عزائم مزید بے نقاب ہوئے ہیں۔

بیان میں کہا گیا کہ پاک افغان سرحد پر پیش آنے والا یہ واقعہ ایک بار پھر پاکستان کے اس مؤقف کی تائید کرتا ہے کہ افغان طالبان حکومت دہشت گرد تنظیموں کو اپنی سرزمین پاکستان کے خلاف سرحد پار دہشت گردی کے لیے استعمال کرنے سے روکنے میں مکمل طور پر ناکام رہی ہے۔ افغان طالبان حکومت مؤثر سرحدی انتظام کو یقینی بنانے اور اپنی بین الاقوامی ذمہ داریاں پوری کرنے میں بھی مسلسل ناکام رہی ہے۔

آئی ایس پی آر نے کہا کہ پاکستان کی سکیورٹی فورسز ملکی سرحدوں کے دفاع کے اپنے عزم پر ثابت قدم اور غیر متزلزل ہیں۔ علاقے میں کسی بھی مزید بھارتی سرپرستی میں سرگرم خوارج کے خاتمے کے لیے سینیٹائزیشن آپریشن جاری ہے۔

بیان کے مطابق وفاقی ایپکس کمیٹی برائے قومی ایکشن پلان کی منظوری سے وژن ’’عزمِ استحکام‘‘ کے تحت سکیورٹی فورسز اور قانون نافذ کرنے والے اداروں کی جانب سے ملک سے غیر ملکی سرپرستی اور حمایت یافتہ دہشت گردی کے خاتمے کے لیے انسدادِ دہشت گردی مہم پوری رفتار سے جاری رہے گی۔