بلوچستان میں سکیورٹی فورسز کی کارروائیاں، 19 بھارتی سرپرستی یافتہ دہشت گرد ہلاک

23 ستمبر, 202623 ستمبر, 2026

Read Time:1 Minute, 45 Second

اسلام آباد، یورپ ٹوڈے: سکیورٹی فورسز نے بلوچستان کے مختلف علاقوں میں کارروائیوں کے دوران بھارتی سرپرستی میں سرگرم فتنۃ الخوارج اور فتنۃ الہندوستان سے وابستہ 19 دہشت گردوں کو ہلاک کردیا۔

پاک فوج کے شعبہ تعلقات عامہ (آئی ایس پی آر) کے مطابق انٹیلی جنس اداروں نے کوئٹہ کے ضلع میں شابان کے علاقے میں بھارتی سرپرستی میں سرگرم فتنۃ الخوارج اور فتنۃ الہندوستان کے متعدد ٹھکانوں کی موجودگی کی اطلاع دی تھی، جو مقامی آبادی کے لیے خطرے کا باعث تھے۔

مقامی آبادی کے تحفظ اور علاقے کو دہشت گردوں سے پاک کرنے کے لیے سکیورٹی فورسز نے پیر سے شابان میں کلیئرنس آپریشن شروع کیا۔ کارروائی کے دوران سکیورٹی فورسز نے متعدد دہشت گردوں کے ٹھکانوں کو مؤثر انداز میں نشانہ بناتے ہوئے انہیں کلیئر کیا۔

آئی ایس پی آر کے مطابق شدید فائرنگ کے تبادلے کے بعد اب تک 13 بھارتی سرپرستی یافتہ دہشت گرد ہلاک ہوچکے ہیں، جبکہ کلیئر کیے گئے ٹھکانوں سے اسلحہ، گولہ بارود اور دھماکا خیز مواد بھی برآمد کیا گیا ہے۔

آئی ایس پی آر نے بتایا کہ علاقے میں خطرے کے مکمل خاتمے تک کلیئرنس آپریشن جاری رہے گا۔

دریں اثنا، گزشتہ دو روز کے دوران کیچ اور کوئٹہ ویسٹ اضلاع میں سکیورٹی فورسز نے انٹیلی جنس معلومات کی بنیاد پر پیشگی کارروائیاں بھی کیں۔ کارروائیوں کے دوران فوجی جوانوں نے دہشت گردوں کو مؤثر انداز میں نشانہ بنایا۔

شدید فائرنگ کے تبادلے میں مزید 6 دہشت گرد ہلاک ہوئے، جبکہ ان کے قبضے سے اسلحہ اور گولہ بارود بھی برآمد کیا گیا۔

فائرنگ کے تبادلے کے دوران 39 سالہ صوبیدار محمد جمیل، جو تونسہ شریف، ضلع ڈیرہ غازی خان کے رہائشی تھے، نے فرض کی ادائیگی کے دوران جامِ شہادت نوش کیا۔

آئی ایس پی آر کے مطابق قومی ایکشن پلان پر وفاقی ایپکس کمیٹی کی منظوری سے ’’عزمِ استحکام‘‘ کے وژن کے تحت جاری انسدادِ دہشت گردی مہم پوری رفتار سے جاری رہے گی۔

آئی ایس پی آر نے مزید کہا کہ سکیورٹی فورسز اور قانون نافذ کرنے والے ادارے ملک سے بیرونی سرپرستی اور حمایت یافتہ دہشت گردی کے ناسور کے خاتمے کے لیے پرعزم ہیں۔