وزیراعظم شہباز شریف کی ریاض ایئرپورٹ پر حوثی ملیشیا کے حملے کی مذمت، سعودی عرب سے یکجہتی کا اظہار

11 اکتوبر, 202611 اکتوبر, 2026

Read Time:57 Second

اسلام آباد، یورپ ٹوڈے: وزیراعظم شہباز شریف نے ریاض کے کنگ خالد انٹرنیشنل ایئرپورٹ پر حوثی ملیشیا کے حملے کی شدید مذمت کرتے ہوئے جاں بحق افراد کے لواحقین سے دلی تعزیت اور زخمیوں کی جلد اور مکمل صحت یابی کے لیے دعا کی ہے۔

وزیراعظم نے اپنے بیان میں کہا کہ شہریوں اور اہم تنصیبات کو نشانہ بنانا کسی صورت قابل قبول نہیں، ایسے پُرتشدد اقدامات علاقائی امن و استحکام کے لیے سنگین خطرہ ہیں۔

انہوں نے بین الاقوامی قانون کی صریح خلاف ورزی کرنے والے حملوں کو فوری طور پر بند کرنے پر زور دیا۔

وزیراعظم شہباز شریف نے سعودی عرب کی قیادت اور عوام کے ساتھ پاکستان کی غیر متزلزل یکجہتی کا اعادہ کرتے ہوئے کہا کہ پاکستان مکہ مشترکہ دفاعی معاہدے کے تحت سعودی عرب کی حمایت کے عزم پر قائم ہے۔

انہوں نے کہا کہ پاکستان سعودی عرب کی خودمختاری، علاقائی سالمیت اور سلامتی کے تحفظ کے لیے اپنے عزم پر قائم ہے۔

وزیراعظم نے مزید کہا کہ پاکستان اور سعودی عرب کے درمیان برادرانہ تعلقات اور دیرینہ وابستگی مضبوط ہیں اور دونوں ممالک کے باہمی تعلقات مزید مستحکم ہو رہے ہیں۔