پاکستان مستقبل قریب میں بریکس کی رکنیت حاصل کر لے گا: رانا احسان افضل خان

کازان، یورپ ٹوڈے: وزیراعظم شہباز شریف کے مشیر رانا احسان افضل خان نے توقع ظاہر کی ہے کہ پاکستان مستقبل قریب میں بریکس (BRICS) تنظیم کی رکنیت حاصل کر لے گا۔ رانا احسان افضل خان نے کہا کہ پاکستان نے بریکس کی رکنیت کے لیے درخواست جمع کرائی ہے اور امید ہے کہ جلد ہی پاکستان کو اس اہم تنظیم کی رکنیت حاصل ہو جائے گی۔

روسی میڈیا سے گفتگو کرتے ہوئے انہوں نے بریکس کو ایک مضبوط فورم قرار دیا جو دنیا کی معیشت کا اہم حصہ ہے۔ انہوں نے مزید کہا کہ بریکس عالمی معیشت میں نمایاں کردار ادا کرتا ہے اور پاکستان اس تنظیم کا حصہ بننے کے لیے پرعزم ہے۔

بریکس ایک بین الحکومتی تنظیم ہے جو 2006 میں قائم کی گئی تھی اور یکم جنوری سے اس کی سربراہی روس کے پاس ہے۔ تنظیم کے موجودہ ارکان میں روس، برازیل، انڈیا، چین، جنوبی افریقہ، مصر، ایتھوپیا، ایران، متحدہ عرب امارات، اور سعودی عرب شامل ہیں۔

قازن میں دو روزہ سربراہی اجلاس کے بعد روسی صدر ولادیمیر پیوٹن نے بریکس کا علامتی بینک نوٹ وزرا کو دکھایا، جس کے بارے میں وضاحت کی گئی کہ یہ صرف علامتی ہے اور کرنسی نوٹوں سے مشابہت رکھنے والا یہ بینک نوٹ روسی حکام نے تیار کیا ہے۔