چیمپئنز ٹرافی 2025 کے مستقبل کا حتمی فیصلہ آج متوقع، دبئی میں اہم آئی سی سی بورڈ میٹنگ
دبئی، ، یورپ ٹوڈے: چیمپئنز ٹرافی 2025 کے مستقبل کا حتمی فیصلہ آج دبئی میں منعقد ہونے والی انٹرنیشنل کرکٹ کونسل (آئی سی سی) کی بورڈ میٹنگ میں متوقع ہے۔ اجلاس میں پاکستان کی نمائندگی کے لیے چیئرمین محسن نقوی شرکت کریں گے، جو آج صبح دبئی روانہ ہوں گے۔
اطلاعات کے مطابق بھارت نے پاکستانی پارٹنرشپ یا فیوژن فارمولے میں عدم دلچسپی کا اظہار کیا ہے۔ آئی سی سی کے نئے سربراہ جے شاہ نے جمعرات کو بورڈ ممبران کے ساتھ ایک اہم میٹنگ طے کی ہے، جس کے بارے میں انہوں نے اسے تعارفی نشست قرار دیا ہے۔ تاہم، ذرائع کے مطابق اس اجلاس میں چیمپئنز ٹرافی کے حوالے سے اہم فیصلے کیے جائیں گے۔
حیران کن طور پر، بھارتی ٹیم کے دورہ پاکستان سے انکار کا معاملہ میٹنگ کے ایجنڈے میں شامل نہیں ہے۔
دریں اثنا، چیمپئنز ٹرافی کے لیے لاہور کے قذافی اسٹیڈیم کی تعمیر نو کا کام تیز رفتاری سے جاری ہے۔ پاکستان کرکٹ بورڈ (پی سی بی) کے مطابق 53 روز میں 80 فیصد تعمیراتی کام مکمل کر لیا گیا ہے۔
چیئرمین محسن نقوی نے اسٹیڈیم کا تفصیلی دورہ کیا اور تعمیراتی پیش رفت کا جائزہ لیا۔ رپورٹ کے مطابق، گراؤنڈ کی مرکزی بلڈنگ کا گرے اسٹرکچر 100 فیصد جبکہ پویلین بلڈنگ کا 90 فیصد مکمل ہو چکا ہے۔ انکلوژرز کے تعمیراتی کام کی 75 فیصد تکمیل ہو چکی ہے اور نشستوں کے لیے اسٹرکچر کی تعمیر اور خندق کا کام آخری مراحل میں ہے۔
چیمپئنز ٹرافی 2025 کے کامیاب انعقاد کے لیے یہ اقدامات اہمیت کے حامل ہیں اور پاکستان کرکٹ بورڈ تیزی سے تیاریوں کو حتمی شکل دے رہا ہے۔
