چاڈ میں فرانس نے پہلا فوجی اڈہ چاڈ کےحوالے کردیا، فوجی انخلاء کا آغاز

پیرس، یورپ ٹوڈے: فرانس نے چاڈ میں اپنے فوجی انخلاء کے تحت پہلا فوجی اڈہ حوالے کر دیا ہے۔ فرانسیسی اور چاڈی فوجی حکام نے جمعرات کو اس پیش رفت کی تصدیق کی۔

چاڈی فوج کے چیف آف اسٹاف نے اعلان کیا کہ شمالی علاقے میں واقع فایا-لارگو کا فوجی اڈہ باقاعدہ طور پر چاڈی حکام کے حوالے کر دیا گیا ہے۔ مزید یہ کہ مشرقی شہر ابیچے اور دارالحکومت نجامینا میں موجود فرانسیسی فوجی اڈوں سے انخلاء کی پیش رفت کے بارے میں جلد عوام کو آگاہ کیا جائے گا۔

اطلاعات کے مطابق فرانسیسی فوجی فایا-لارگو اڈے سے گاڑیوں میں سوار ہوکر تقریباً 780 کلومیٹر جنوب میں دارالحکومت نجامینا کی طرف روانہ ہو گئے، تاہم ان کی تعداد کا انکشاف نہیں کیا گیا۔

فرانسیسی فوج کے چیف آف اسٹاف نے ایک علیحدہ بیان میں کہا، “یہ حوالگی طے شدہ شیڈول اور شرائط کے مطابق انجام پائی۔”

گزشتہ ماہ چاڈ نے اچانک فرانس کے ساتھ فوجی تعاون ختم کر دیا تھا، جس کے بعد فرانسیسی فوج نے انخلاء شروع کیا۔ یہ عمل فرانسیسی جنگی طیاروں کی روانگی کے دس دن بعد شروع ہوا اور اتوار کو ہونے والے پارلیمانی اور بلدیاتی انتخابات کے پیش نظر تیز ہوگیا ہے۔

انخلاء سے قبل، چاڈ میں فرانسیسی فوج کے تقریباً 1,000 اہلکار تعینات تھے۔ جمعرات کو انخلاء کے ایک حصے کے طور پر، ایک انتونوف 124 کارگو طیارہ 70 ٹن فوجی سامان لے کر روانہ ہوا۔ فرانسیسی حکام نے بتایا کہ باقی فوجی گاڑیاں جنوری تک روانہ ہوں گی اور کیمرون کے ڈوالا بندرگاہ کے ذریعے واپس لائی جائیں گی