پاکستان، نیوزی لینڈ اور جنوبی افریقا کے درمیان ٹرائی نیشن سیریز کا آغاز آج سے

اسلام آباد، یورپ ٹوڈے: پاکستان، نیوزی لینڈ اور جنوبی افریقا کے درمیان تین ملکی کرکٹ سیریز کا آغاز آج سے ہو رہا ہے، جس کے پہلے میچ میں پاکستان اور نیوزی لینڈ کی ٹیمیں لاہور کے قذافی اسٹیڈیم میں مدمقابل ہوں گی۔

سیریز کے باضابطہ آغاز سے قبل تینوں ٹیموں کے کپتانوں کے ہمراہ ٹرافی کی رونمائی کی گئی، جس کے بعد نیوزی لینڈ کی ٹیم نے لاہور میں بھرپور پریکٹس کی۔

نیوزی لینڈ کے کپتان مچل سینٹنر نے ٹرافی کے ساتھ تصویر بنوائی اور اس موقع پر اپنے تاثرات کا اظہار کرتے ہوئے کہا کہ چیمپئنز ٹرافی سے قبل یہ تین ملکی سیریز انتہائی اہمیت کی حامل ہے۔ انہوں نے پہلی بار لاہور آنے پر خوشی کا اظہار کرتے ہوئے کہا کہ قذافی اسٹیڈیم ایک انتہائی خوبصورت گراؤنڈ ہے۔

یہ ٹرائی نیشن سیریز آئندہ آنے والے بڑے کرکٹ ایونٹس کے لیے تیاری کا بہترین موقع ثابت ہوگی، جہاں تینوں ٹیمیں اپنی کارکردگی کو جانچنے اور کمزوریوں کو دور کرنے کا موقع حاصل کریں گی۔