وفاقی حکومت کا ڈیجیٹل پرائز بانڈ متعارف کرانے کا فیصلہ

اسلام آباد، یورپ ٹوڈے: وفاقی حکومت نے ڈیجیٹل پرائز بانڈ متعارف کرانے کا فیصلہ کر لیا ہے، جس کی لین دین موبائل ایپ کے ذریعے ہوگی، جس سے بانڈز کی خرید و فروخت مزید محفوظ اور آسان بنائی جائے گی۔

ڈیجیٹل پرائز بانڈز چوری اور نقصان کے خدشات سے محفوظ ہوں گے، جبکہ انعامی رقم پر ٹیکس لاگو ہوگا تاہم زکوٰۃ سے مستثنیٰ ہوگی۔ حکومت کی جانب سے 500، 1,000، 5,000 اور 10,000 روپے کے بانڈز جاری کیے جائیں گے۔

بانڈز کی خریداری صرف نیشنل سیونگز موبائل ایپ یا منظور شدہ چینلز کے ذریعے ممکن ہوگی، جبکہ قرعہ اندازی ہر تین ماہ بعد ہوگی، اور انعامی رقم براہ راست صارف کے لنک شدہ بینک اکاؤنٹ میں منتقل کی جائے گی۔

حکام کے مطابق، ڈیجیٹل بانڈز معیشت کو دستاویزی بنانے میں مددگار ثابت ہوں گے، جبکہ خریداری کے وقت نامزدگی کی سہولت بھی دستیاب ہوگی۔ اس کے علاوہ، ورثا کو جانشینی سرٹیفکیٹ کے مطابق ادائیگی کی جائے گی، جبکہ کاغذ کے بغیر بانڈز کے نفاذ سے پرنٹنگ اور لاجسٹکس کے اضافی اخراجات ختم ہو جائیں گے۔