چینی نائب صدر ہان ژینگ کی فجی کے پارلیمانی اسپیکر فلیمونے جیتوکو سے ملاقات

بیجنگ: چینی نائب صدر ہان ژینگ نے جمعہ کے روز بیجنگ میں جمہوریہ فجی کی پارلیمنٹ کے اسپیکر فلیمونے جیتوکو سے ملاقات کی۔

ہان ژینگ نے اس موقع پر کہا کہ فجی ان پہلے بحرالکاہل جزیرہ ممالک میں شامل ہے جنہوں نے نئی چین کے ساتھ سفارتی تعلقات قائم کیے۔ انہوں نے کہا کہ دونوں ممالک کے تعلقات بین الاقوامی منظرنامے میں آنے والی تبدیلیوں کی آزمائش پر پورا اترے ہیں اور یہ تعلقات باہمی احترام اور مشترکہ ترقی پر مبنی ایک جامع اسٹریٹجک شراکت داری کی حیثیت اختیار کر چکے ہیں۔

چینی نائب صدر نے کہا کہ چین، فجی کے ساتھ مل کر دونوں ممالک کے رہنماؤں کے درمیان طے پانے والے اہم اتفاق رائے پر خلوص نیت سے عملدرآمد کرنے، روایتی دوستی کو فروغ دینے اور سفارتی تعلقات کے قیام کی 50ویں سالگرہ کو مشترکہ طور پر منانے کے لیے تیار ہے۔

ہان ژینگ نے مزید کہا کہ چین اور فجی کے درمیان سیاسی باہمی اعتماد کو مزید مضبوط بنانے اور ایک دوسرے کے بنیادی مفادات اور اہم خدشات کی بھرپور حمایت کرنے کی ضرورت ہے۔ انہوں نے دوطرفہ تعلقات کی پائیدار اور صحت مند ترقی کے فروغ کے لیے مزید عملی تعاون پر بھی زور دیا۔

فلیمونے جیتوکو نے اس موقع پر کہا کہ “ایک چین” کے اصول کی پاسداری فجی-چین تعلقات کی بنیاد ہے۔ انہوں نے چین کی جانب سے پیش کردہ اہم اقدامات اور نظریات کی بھرپور پذیرائی کی اور کہا کہ فجی چین کے ساتھ سیاسی باہمی اعتماد کو مسلسل مضبوط بنانے، بنیادی ڈھانچے، غربت کے خاتمے اور سیاحت جیسے شعبوں میں تعاون کو فروغ دینے اور دونوں ممالک کی قانون ساز اور حکومتی سطح پر تبادلوں کو مزید گہرا کرنے کا خواہاں ہے۔