احسن اقبال نے ترکمانستان کی توانائی کمپنیوں کو پاکستان میں سرمایہ کاری کی دعوت دی

عشق آباد، یورپ ٹوڈے: وفاقی وزیر برائے منصوبہ بندی و ترقی احسن اقبال نے ترکمانستان کی توانائی کمپنیوں کو پاکستان میں آپریشنز قائم کرنے کی دعوت دی ہے۔

اشک آباد میں ایک تقریب سے خطاب کرتے ہوئے انہوں نے ترکمانستان تا پاکستان گیس پائپ لائن منصوبے کی تکمیل کے حوالے سے امید کا اظہار کیا۔ انہوں نے کہا کہ اس منصوبے سے ترکمانستان کے توانائی وسائل پاکستان اور اس سے آگے دیگر خطوں تک پہنچ سکیں گے۔

احسن اقبال نے اس بات پر زور دیا کہ یہ منصوبہ علاقائی توانائی سلامتی میں اہم کردار ادا کرے گا اور پاکستان کی سبز توانائی کی منتقلی میں معاون ثابت ہوگا، جو ماحولیاتی تبدیلی کے چیلنجز سے نمٹنے اور پائیدار و قابل رسائی توانائی کی فراہمی کے لیے ضروری ہے۔وزیر منصوبہ بندی نے گوشت، مچھلی، پھلوں اور دیگر زرعی مصنوعات میں تعاون کے وسیع مواقع کی بھی نشاندہی کی۔

انہوں نے ترکمانستان کی کپاس کی پیداوار اور پاکستان کی ٹیکسٹائل صنعت کے درمیان مضبوط صنعتی تعاون کی صلاحیت کو بھی اجاگر کیا۔