صدر مملکت آصف علی زرداری چار روزہ سرکاری دورے پر چین روانہ ہوں گے

اسلام آباد، یورپ ٹوڈے: صدر مملکت آصف علی زرداری منگل کو چار روزہ سرکاری دورے پر چین روانہ ہوں گے۔ ان کے دورۂ چین کے سلسلے میں مختلف حکومتی ٹیموں کی روانگی پہلے ہی شروع ہو چکی ہے۔

نیوز ہب کنسلٹنٹس کے مطابق، صدر زرداری 4 سے 8 فروری تک چین کا سرکاری دورہ کریں گے، جہاں وہ اعلیٰ سطحی وفد کے ہمراہ مختلف ملاقاتیں کریں گے۔ ان کے وفد میں بلاول بھٹو زرداری، خاتون اول آصفہ بھٹو زرداری، وزیر اعلیٰ سندھ مراد علی شاہ، وزیر اعلیٰ بلوچستان سرفراز بگٹی اور وزیر داخلہ محسن نقوی شامل ہوں گے۔

ذرائع کے مطابق، صدر آصف علی زرداری چینی صدر شی جن پنگ سے اہم ملاقات کریں گے، جبکہ وہ 5 فروری کو شنگھائی عالمی نمائش میں بھی شرکت کریں گے۔

دورے کے دوران، چینی قیادت سے ملاقاتوں میں سی پیک فیز 2، پاک چین تعلقات، علاقائی و عالمی سلامتی سمیت دیگر باہمی امور پر مشاورت کی جائے گی۔ علاوہ ازیں، بلاول بھٹو زرداری اور آصفہ بھٹو زرداری چین کے سرمائی گیمز کے مقابلے بھی دیکھیں گے۔

ذرائع کا کہنا ہے کہ صدر مملکت کی چینی قیادت کے ساتھ اہم ملاقاتیں بھی شیڈول کا حصہ ہیں، جن میں دوطرفہ تعاون کو مزید فروغ دینے پر تبادلہ خیال کیا جائے گا۔