یومِ فضائیہ: صدر آصف علی زرداری کا پاک فضائیہ کے شہداء اور غازیوں کو خراجِ تحسین

اسلام آباد، یورپ ٹوڈے: صدرِ پاکستان آصف علی زرداری نے یومِ فضائیہ کے موقع پر قوم کی جانب سے پاک فضائیہ کے شہداء، غازیوں اور تمام جوانوں کو خراجِ تحسین پیش کیا ہے۔

اپنے خصوصی پیغام میں صدر مملکت نے کہا کہ پوری قوم اپنے شہداء اور غازیوں کو سلام پیش کرتی ہے جنہوں نے مادرِ وطن کے دفاع کے لیے اپنی جانوں کا نذرانہ پیش کیا اور بے مثال جرات و بہادری کی داستانیں رقم کیں۔

صدر زرداری نے 1965 کی جنگ کو یاد کرتے ہوئے کہا کہ پاک فضائیہ نے اس تاریخی معرکے میں شجاعت اور بہادری کی جو مثال قائم کی، وہ ہمیشہ یاد رکھی جائے گی۔ اُن کا کہنا تھا کہ پاک فضائیہ نے نہ صرف جنگوں میں بلکہ ہر کڑے وقت میں پیشہ ورانہ مہارت، بلند حوصلے اور جرات کا مظاہرہ کیا ہے۔

انہوں نے مزید کہا کہ پاک فضائیہ نے ’’معرکۂ حق، بنیان المرصوص‘‘ میں فیصلہ کن کردار ادا کیا اور دشمن کو ہر محاذ پر منہ توڑ جواب دیا، جس پر پوری قوم کو فخر ہے۔ صدر مملکت نے اس بات پر زور دیا کہ پاک فضائیہ کی جدید اور شاندار صلاحیتیں ملکی دفاع کی مضبوط ضمانت ہیں، جو ہمیشہ قومی فضائی حدود اور سالمیت کی حفاظت میں صفِ اوّل پر رہتی ہیں۔