فیلڈ مارشل عاصم منیر کی مصری صدر عبدالفتاح السیسی سے ملاقات، پاک مصر تعلقات مزید مستحکم کرنے پر اتفاق

قاہرہ، یورپ ٹوڈے: پاک فوج کے سپہ سالار فیلڈ مارشل عاصم منیر نے مصر کے صدر عبدالفتاح السیسی سے قاہرہ کے اتحادیہ صدارتی محل میں اہم ملاقات کی، جس میں پاک مصر دو طرفہ تعلقات، خطے کی صورتحال اور باہمی دلچسپی کے امور پر تفصیلی تبادلۂ خیال کیا گیا۔

آئی ایس پی آر کے مطابق ملاقات کے دوران پاکستان اور مصر کے درمیان طویل المدتی دوستی اور برادرانہ تعلقات کو مزید مضبوط بنانے کے عزم کا اعادہ کیا گیا۔ فیلڈ مارشل عاصم منیر نے خطے میں امن و استحکام کے فروغ کے لیے مصری قیادت کے مؤثر کردار کو سراہا۔

مصری صدر عبدالفتاح السیسی نے عالمی اور امتِ مسلمہ کے اہم معاملات میں پاکستان کے مثبت اور فعال کردار کی تعریف کی۔ انہوں نے دونوں ممالک کے درمیان تعلقات کو آگے بڑھانے کے عزم کا اظہار بھی کیا۔

فریقین نے باہمی اسٹریٹجک مفادات پر مبنی قریبی رابطوں اور عوامی سطح پر تعلقات کے فروغ کی اہمیت پر زور دیا۔ ملاقات میں پاکستان اور مصر کے تاریخی برادرانہ تعلقات کو مزید وسعت دینے پر مکمل اتفاق کیا گیا۔

آرمی چیف فیلڈ مارشل عاصم منیر اور صدر عبدالفتاح السیسی نے اس بات پر اتفاق کیا کہ سماجی و معاشی تعاون، ٹیکنالوجی اور سیکیورٹی کے شعبوں میں دو طرفہ اشتراکِ عمل کو مزید فروغ دیا جائے گا، تاکہ دونوں ممالک ترقی اور استحکام کی نئی راہیں ہموار کر سکیں۔