میونخ سکیورٹی کانفرنس کے موقع پر آذربائیجان اور جرمنی کے وزرائے خارجہ کی ملاقات
باکو، یورپ ٹوڈے: جمہوریہ آذربائیجان کے وزیرِ خارجہ جیہون بیراموف نے میونخ سکیورٹی کانفرنس کے موقع پر وفاقی جمہوریہ جرمنی کے وزیرِ خارج ہیوہان ڈیوڈ واڈیفولسے ملاقات کی۔
ملاقات کے دوران دونوں رہنماؤں نے آذربائیجان اور جرمنی کے درمیان دوطرفہ تعلقات کی موجودہ صورتحال اور مستقبل کے امکانات کے ساتھ ساتھ علاقائی سلامتی کے امور پر تفصیلی تبادلہ خیال کیا۔
فریقین نے اعلیٰ سطحی سیاسی مکالمے کے تسلسل کی اہمیت پر زور دیتے ہوئے اس بات کا اعادہ کیا کہ باہمی دوروں اور بین الاقوامی پلیٹ فارمز پر ملاقاتوں سے دوطرفہ تعاون کو مزید وسعت دینے میں نمایاں مدد ملتی ہے۔
وزرائے خارجہ نے معیشت، تجارت، توانائی کے تحفظ، زراعت، ٹرانسپورٹ اور لاجسٹکس سمیت ثقافتی اور انسانی شعبوں میں تعاون کو فروغ دینے کی ضرورت کو اجاگر کیا۔ اس موقع پر آذربائیجان کی جانب سے شروع کیے گئے اور اس کی شراکت سے مکمل ہونے والے اسٹریٹجک توانائی اور ٹرانسپورٹ منصوبوں کے یورپ کی توانائی سلامتی اور خطے میں پائیدار ترقی کے لیے کردار کو بھی سراہا گیا۔
فریقین نے قابلِ تجدید توانائی کے شعبے میں تعاون، ’’گرین ٹرانزیشن‘‘ کے فریم ورک کے تحت مشترکہ منصوبوں اور وسطی ایشیا سمیت وسیع تر خطے میں مربوط کوششوں کے امکانات کا بھی جائزہ لیا۔
بین الاقوامی تنظیموں کے اندر باہمی تعاون پر گفتگو کرتے ہوئے دونوں وزراء نے ایک دوسرے کے جائز مفادات اور باہمی اعتماد کے اصولوں کی بنیاد پر کثیرالجہتی پلیٹ فارمز پر تعاون جاری رکھنے کے عزم کا اظہار کیا۔
وزیرِ خارجہ جیہون بیراموف نے اپنے جرمن ہم منصب کو بعد از تنازعہ دور میں خطے کی موجودہ صورتحال، آرمینیا۔آذربائیجان نارملائزیشن عمل اور تاریخی واشنگٹن سمٹ کے بعد خطے میں عملی امن اور تعاون کے آغاز کے لیے آذربائیجان کی جانب سے اٹھائے گئے اقدامات پر بریفنگ دی۔
ملاقات میں باہمی دلچسپی کے دیگر دوطرفہ اور علاقائی امور پر بھی خیالات کا تبادلہ کیا گیا۔
