آذربائیجان کی گرین انرجی حکمتِ عملی، تین نئے سولر پاور پراجیکٹس کی منظوری
باکو، یورپ ٹوڈے: جمہوریہ آذربائیجان کی حکومت نے باکو میں منعقدہ 11ویں سدرن گیس کوریڈور ایڈوائزری کونسل کے وزارتی اجلاس اور تیسرے گرین انرجی ایڈوائزری کونسل کے وزارتی اجلاس کے موقع پر تین نئے شمسی توانائی منصوبوں کے لیے کلیدی سرمایہ کاری اور عملدرآمد کے معاہدوں پر دستخط کیے ہیں۔
یہ معاہدے آذربائیجان کی گرین انرجی کی جانب منتقلی اور پائیدار توانائی کے شعبے کی ترقی کی جانب ایک اہم پیش رفت کی نمائندگی کرتے ہیں۔
وزیر توانائی پرویز شہبازوف اور “اینرسو جبرائیل ایل ایل سی” کے سی ای او ایلدار مامّاد زادہ نے “اُفق” سولر پی وی منصوبے کے لیے سرمایہ کاری کے معاہدے پر دستخط کیے، جس کی پیداواری صلاحیت 50 میگاواٹ ہوگی اور یہ منصوبہ آذربائیجان میں ہی تعمیر کیا جائے گا۔
اسی طرح ایک علیحدہ معاہدے کے تحت وزیر توانائی پرویز شہبازوف اور “کلین انرجی جبرائیل ایل ایل سی” کی سی ای او خائلا نقیے وا نے “شمس” سولر پی وی منصوبے کے لیے بھی 50 میگاواٹ صلاحیت کے سرمایہ کاری معاہدے پر دستخط کیے۔
اس کے علاوہ نائب وزیر توانائی ایلنور سلطانوف اور “نوبل انرجی لمیٹڈ” کے سی ای او ووگار سمدلی کے درمیان وزارت توانائی اور نوبل انرجی لمیٹڈ کے مابین نخچیوان خودمختار جمہوریہ میں 30 میگاواٹ کے شمسی بجلی گھر کی جانچ، ترقی اور عملدرآمد سے متعلق عملدرآمدی معاہدہ طے پایا۔
یہ شمسی توانائی کے منصوبے آذربائیجان کے گرین انرجی زون کی ترقی کا اہم حصہ ہیں۔ منصوبوں کی تکمیل کے بعد یہ تینوں منصوبے سالانہ 268 ملین کلو واٹ گھنٹے بجلی پیدا کرنے کی صلاحیت رکھیں گے، جس کے ذریعے تقریباً 5 کروڑ 90 لاکھ مکعب میٹر قدرتی گیس کی بچت ممکن ہوگی اور سالانہ 1 لاکھ 28 ہزار ٹن کاربن اخراج میں کمی آئے گی۔
یہ معاہدے آذربائیجان کی توانائی کے تنوع، توانائی تحفظ میں بہتری اور ماحولیاتی تحفظ و عالمی ماحولیاتی تبدیلی کے خلاف اقدامات میں شراکت داری کے مضبوط عزم کا مظہر ہیں۔
