ادارۂ فروغِ قومی زبان میں مشہور شاعر باقی صدیقی کی 53ویں برسی پر خراجِ تحسین کی تقریب منعقد

اسلام آباد، یورپ ٹوڈے: ادارۂ فروغِ قومی زبان اور ایوان باقی صدیقی کے زیرِ اہتمام 8 جنوری 2025ء کو برصغیر پاک و ہند کے مشہور شاعر، ادیب اور ڈرامہ نگار جناب باقی صدیقی کی 53ویں برسی کے موقع پر انہیں خراجِ تحسین پیش کرنے کے لیے ایک روزہ تقریب کا انعقاد کیا گیا۔

تقریب میں ڈاکٹر محمد سلیم مظہر، ڈائرکٹر جنرل ادارۂ فروغِ قومی زبان، اور ایگزیکٹو ڈائریکٹر جناب راشد حمید نے باقی صدیقی کی ادبی خدمات پر سیر حاصل گفتگو کی۔ انہوں نے باقی صدیقی کی تخلیقات کو اردو ادب کا قیمتی سرمایہ قرار دیتے ہوئے ان کے ادب میں گہرے اثرات کا ذکر کیا۔

اس موقع پر پروفیسر ڈاکٹر ناشاد صاحب سمیت دیگر معززین نے بھی اظہارِ خیال کیا اور باقی صدیقی کی شخصیت اور تخلیقات پر روشنی ڈالی۔ مقررین نے کہا کہ باقی صدیقی نے ادب میں شاعری، ڈرامہ نگاری اور افسانہ نویسی کے ذریعے ایک منفرد مقام حاصل کیا۔

تقریب میں اردو ادب کے مختلف شعبہ جات سے تعلق رکھنے والے افراد نے شرکت کی اور باقی صدیقی کے ادب اور ان کے تخلیقی کام کو بھرپور انداز میں سراہا۔