وزیراعلیٰ مریم نواز نے پنجاب کا پہلا مصنوعی ذہانت روڈمیپ منظور کر لیا
لاہور، یورپ ٹوڈے: وزیراعلیٰ پنجاب مریم نواز شریف نے صوبے کا پہلا مصنوعی ذہانت (AI) روڈمیپ منظور کر لیا ہے، جس کے تحت پنجاب کو سال 2029 تک جنوبی ایشیا کا نمایاں اے آئی پر مبنی خطہ بنانے کا ہدف مقرر کیا گیا ہے۔
اس منصوبے کے تحت پنجاب میں دنیا کا پہلا اے آئی ڈلیوری یونٹ قائم کیا جائے گا جو حکمرانی اور عوامی خدمات میں مصنوعی ذہانت کے استعمال کو تیز کرنے میں اہم کردار ادا کرے گا۔ وزیراعلیٰ مریم نواز شریف اس یونٹ اور روڈمیپ پر عملدرآمد کی نگرانی کرنے والی خصوصی پراجیکٹ ٹیم کی چیئرپرسن ہوں گی۔
روڈمیپ پر بریفنگ کے دوران پنجاب کے اے آئی ایڈوائزر علی ڈار نے وزیراعلیٰ کو بتایا کہ اس منصوبے سے آئندہ تین برسوں میں ایک لاکھ سے زائد روزگار کے مواقع پیدا ہونے کی توقع ہے۔ اس کے علاوہ ٹیکنالوجی پر مبنی ترقی کے ذریعے پنجاب کی مجموعی ملکی پیداوار (جی ڈی پی) میں پانچ سے دس فیصد اضافہ اور زرمبادلہ کے ذخائر میں 10 سے 20 ارب ڈالر تک اضافے کا امکان بھی ظاہر کیا گیا ہے۔
روڈمیپ میں اے آئی انفراسٹرکچر کی ترقی، انتظامی نظام، شہری خدمات، مہارتوں کی تربیت، اے آئی سے چلنے والی معاشی ترقی اور حکمرانی کے شعبوں کو شامل کیا گیا ہے۔ اس مقصد کے لیے چار خصوصی ٹیمیں تشکیل دی جائیں گی جو خصوصی منصوبوں، ڈیٹا مینجمنٹ، اسٹریٹجک آپریشنز اور اسٹریٹجک کمیونیکیشن پر کام کریں گی۔
وزیراعلیٰ نے اے آئی ٹیکنیکل ایڈوائزری بورڈ کے قیام کی بھی منظوری دی اور ہدایت کی کہ اس میں اس شعبے کے ممتاز ماہرین کو شامل کیا جائے تاکہ منصوبے کی مؤثر رہنمائی ممکن ہو سکے۔
عملدرآمد کے شیڈول کے مطابق پنجاب اے آئی روڈمیپ منشور اسی ماہ جاری کیا جائے گا جبکہ جون میں اے آئی ڈلیوری یونٹ کا بین الاقوامی سطح پر آغاز کیا جائے گا۔ جولائی میں اے آئی گورننس پالیسی متعارف کرائی جائے گی جبکہ اگست میں یوم آزادی کے موقع پر گلوبل ٹیک پارٹنرشپ اور سٹیزن پورٹل کا اجرا کیا جائے گا۔
منصوبے کے تحت ستمبر میں ہیلتھ بورڈ ایپ متعارف کرائی جائے گی، اکتوبر میں سموگ کی نگرانی اور تدارک کے لیے اے آئی نظام کو مربوط کیا جائے گا جبکہ نومبر میں کسان اے آئی بورڈ کا آغاز کیا جائے گا۔ وزیراعلیٰ نے یہ بھی ہدایت دی کہ زرعی انٹرنز کو کسان اے آئی بوٹ کے ساتھ منسلک کیا جائے تاکہ کسانوں کو جدید زرعی مشاورت فراہم کی جا سکے۔
حکام کے مطابق پنجاب کے 100 اسکولوں میں پہلے ہی اے آئی نصاب متعارف کرایا جا چکا ہے جبکہ مزید 155 اسکولوں میں اپریل سے مصنوعی ذہانت کی تعلیم شروع کی جائے گی۔
وزیراعلیٰ مریم نواز شریف نے کہا کہ حکومت مصنوعی ذہانت کے ذریعے ہر شعبے کی استعداد اور کارکردگی میں اضافہ کرنا چاہتی ہے۔ ان کا کہنا تھا کہ اے آئی روڈمیپ نوجوانوں کی صلاحیتوں کو بروئے کار لانے اور صوبے کے نوجوان ٹیلنٹ کو ایک مشترکہ ٹیکنالوجیکل وژن کے تحت یکجا کرنے میں مدد دے گا۔
دریں اثنا وزیراعلیٰ مریم نواز شریف نے سینئر اداکار عاصم بخاری کے انتقال پر گہرے دکھ اور افسوس کا اظہار بھی کیا۔ اپنے تعزیتی پیغام میں انہوں نے مرحوم کے اہل خانہ سے دلی ہمدردی اور تعزیت کا اظہار کرتے ہوئے ان کے لیے صبر جمیل کی دعا کی۔
