چین ہمیشہ پاک-چین تعلقات کو تزویراتی اور طویل المدتی تناظر میں دیکھتا ہے
بیجنگ، یورپ ٹوڈے: صدرِ چین شی جن پنگ نے کہا ہے کہ چین ہمیشہ سے پاک-چین تعلقات کو ایک اسٹریٹجک اور طویل المدتی نقطہ نظر سے دیکھتا ہے اور پاکستان کو ہمیشہ اپنی ہمسایہ ممالک کی سفارت کاری میں اولین ترجیح دیتا رہا ہے۔
یہ بات چینی سفیر جیانگ زائی ڈونگ نے پاکستانی میڈیا سے بات چیت کے دوران کہی۔ انہوں نے بتایا کہ رواں برس صدر شی جن پنگ کے تاریخی دورہ پاکستان کو 10 سال مکمل ہو رہے ہیں جبکہ آئندہ سال دونوں ممالک کے درمیان سفارتی تعلقات کی 75ویں سالگرہ منائی جائے گی، جو دوطرفہ تعلقات کے لیے ایک اہم موڑ اور مواقع فراہم کرے گی۔
سفیر جیانگ نے کہا کہ چینی قیادت صدر شی جن پنگ کی 8 اور 9 اپریل کو بیجنگ میں منعقدہ کمیونسٹ پارٹی آف چائنا (CPC) کی مرکزی کانفرنس برائے ہمسایہ ممالک سے متعلق کام کے حوالے سے اہم تقریر کے رہنما اصولوں پر مکمل عملدرآمد کرے گی۔ انہوں نے کہا کہ چین نئی صدی میں ایک مضبوط تر “پاک-چین مشترکہ مستقبل کی کمیونٹی” کی تعمیر کو تیز کرے گا اور دیگر ہمسایہ ممالک کے ساتھ بھی مشترکہ مستقبل کی حامل کمیونٹی کے قیام میں قائدانہ کردار ادا کرتا رہے گا۔
سفیر نے چار نکاتی ترجیحات کا ذکر کرتے ہوئے کہا:
اوّل: ہم اسٹریٹجک باہمی اعتماد کو فروغ دیں گے۔ چین ہمیشہ کی طرح پاکستان کی قومی خودمختاری اور علاقائی سالمیت کے تحفظ، اس کے قومی حالات کے مطابق ترقی کے راستے کے انتخاب، اور استحکام و خوشحالی کے حصول میں بھرپور حمایت جاری رکھے گا۔
دوّم: ہم ترقیاتی انضمام کو گہرا کریں گے۔ چین “بیلٹ اینڈ روڈ” کے تحت اعلیٰ معیار کی تعاون کے لیے آٹھ بڑے اقدامات کو پاکستان کے “5Es” ترقیاتی فریم ورک کے ساتھ ہم آہنگ کرنے کے لیے تیار ہے، تاکہ پاک-چین اقتصادی راہداری (CPEC) کا ایک اپ گریڈ شدہ ورژن تشکیل دیا جا سکے۔
سوّم: ہم سیکیورٹی تعاون کو مزید مضبوط بنائیں گے۔ چین پاکستان کے ساتھ عالمی سلامتی کے اقدام (GSI) کے تحت مفاہمت کی یادداشت پر فعال عملدرآمد کا خواہاں ہے اور انسدادِ دہشت گردی کے شعبے میں پاکستان کی استعداد کار کو بڑھانے میں مدد فراہم کرے گا، تاکہ پاکستان میں استحکام اور عملی تعاون کی راہ ہموار ہو سکے۔
چہارم: ہم عوامی سطح پر روابط کو مزید مضبوط کریں گے۔ چین پاکستان کے ساتھ مل کر مزید بامقصد اور فائدہ مند سرگرمیوں کا اہتمام کرے گا، تاکہ دونوں اقوام کے دلوں میں دوستی کی جڑیں مزید گہری ہوں اور چینی و اسلامی تہذیبیں ایک دوسرے کے ساتھ مل کر نئی درخشندگی کے ساتھ جلوہ گر ہوں۔
سفیر جیانگ زائی ڈونگ نے اس عزم کا اعادہ کیا کہ پاک-چین دوستی ہر آزمائش پر پوری اتری ہے اور مستقبل میں بھی یہ تعلقات مشترکہ ترقی، باہمی احترام، اور اعتماد پر مبنی رہیں گے۔
