آرمی چیف جنرل عاصم منیر کی ملائیشین وزیر اعظم سے ملاقات

اسلام آباد، یورپ ٹوڈے: آرمی چیف جنرل سید عاصم منیر نے ملائیشیا کے وزیرِ اعظم انور ابراہیم سے اہم ملاقات کی۔ انٹر سروسز پبلک ریلیشنز (آئی ایس پی آر) کے مطابق اس ملاقات میں دو طرفہ اسٹریٹجک دلچسپی، علاقائی سلامتی اور دفاعی تعاون کے امور زیرِ بحث آئے۔

ملائیشیا کے وزیر اعظم نے اس موقع پر علاقائی امن و استحکام میں پاکستان کی مسلح افواج کے کردار کو سراہا اور دہشت گردی کے خلاف جنگ میں پاکستانی فوج کی پیشہ ورانہ مہارت کی تعریف کی۔ مزید برآں، انہوں نے پاکستانی فوج کی قربانیوں کا اعتراف کیا اور کہا کہ دہشت گردی کے خلاف پاکستانی فوج نے نمایاں خدمات انجام دی ہیں۔

ملاقات میں پاکستان اور ملائیشیا کے دو طرفہ تعلقات، بالخصوص فوجی تعاون کو مزید فروغ دینے پر زور دیا گیا۔ ملائیشیا کے وزیرِ اعظم نے آرمی چیف کو ملائیشیا کے دورے کی دعوت دی، جس پر جنرل سید عاصم منیر نے ان کا شکریہ ادا کیا۔

آئی ایس پی آر کے مطابق اس دورے سے دونوں ممالک اور افواج کے درمیان تاریخی اور دیرپا تعلقات کو مزید مضبوط بنانے میں مدد ملے گی۔ اس سے قبل آرمی چیف نے ایوانِ صدر میں ملائیشیا کے وزیرِ اعظم کے اعزاز میں منعقدہ تقریب میں بھی شرکت کی تھی۔