آرمی چیف جنرل سید عاصم منیر کا برطانیہ کا دورہ، وار منسٹر اور لارک ہل گیریژن کا معائنہ

راولپنڈی، یورپ ٹوڈے: آرمی چیف جنرل سید عاصم منیر نے اپنے دورۂ برطانیہ کے دوران وار منسٹر اور لارک ہل گیریژن کا دورہ کیا، جہاں انہیں برطانوی فوجی منصوبوں پر بریفنگ دی گئی۔

پاک فوج کے شعبہ تعلقات عامہ (آئی ایس پی آر) کے مطابق، آرمی چیف جنرل سید عاصم منیر نے برطانوی ہم منصب جنرل رولینڈ واکر کی دعوت پر ان تنصیبات کا دورہ کیا، جہاں انہیں برطانوی فوج اور ڈیپ ریک اسٹرائیک بریگیڈ کے منصوبوں پر تفصیلی بریفنگ دی گئی۔

اس موقع پر آرمی چیف نے مصنوعی ذہانت، بغیر پائلٹ سسٹمز اور دیگر جدید فوجی ٹیکنالوجیز کا معائنہ بھی کیا۔ دورے کے دوران، انہیں برطانوی دفاعی نظام اور جدید عسکری حکمت عملیوں سے آگاہ کیا گیا۔

یاد رہے کہ آرمی چیف جنرل سید عاصم منیر دو روز قبل رائل ملٹری اکیڈمی سینڈہرسٹ میں منعقدہ ساتویں علاقائی استحکام کانفرنس میں شرکت کے لیے برطانیہ پہنچے تھے۔