عید میلادالنبی ﷺ کے موقع پر ملک بھر میں جشن، توپوں کی سلامی اور خصوصی دعاؤں کا اہتمام

اسلام آباد، یورپ ٹوڈے: عید میلادالنبی ﷺ کے موقع پر وفاقی دارالحکومت میں نماز فجر کے بعد 31 توپوں اور صوبائی دارالحکومتوں میں 21، 21 توپوں کی سلامی دی گئی۔

دن کے آغاز پر مساجد اور گھروں میں ملکی ترقی، سلامتی، خوشحالی اور امت مسلمہ کے اتحاد کے لیے خصوصی دعائیں مانگی گئیں۔ نبی کریم حضرت محمد ﷺ کی ولادت کا جشن آج پورے ملک میں مذہبی جوش و جذبے سے منایا جا رہا ہے۔

ملک کے تمام شہروں، گلیوں اور بازاروں کو چراغاں کیا گیا ہے جبکہ مساجد، بلند عمارتوں اور چوراہوں پر سبز پرچموں کی بہار دکھائی دے رہی ہے۔ درود و سلام کی محفلیں سجائی جارہی ہیں اور آقائے دو جہاں ﷺ سے محبت کا بھرپور اظہار کیا جا رہا ہے۔

ملک بھر میں میلاد النبی ﷺ کے جلوس برآمد کیے جائیں گے۔ اس موقع پر صدر مملکت اور وزیراعظم نے امت مسلمہ کے نام خصوصی پیغامات جاری کرتے ہوئے امن، بھائی چارے اور اتحاد کی ضرورت پر زور دیا ہے۔